Espazo Ecosocialista anima a participar masivamente nas mobilizacións convocadas pola Alianza Social Galega

Para a organización ecosocialista “retomar a actividade da Alianza Social Galega é un acerto, e ten que manterse a súa mobilización e mesmo ten que seguir a medrar ata artellarse en toda Galicia sumando tódalas organizacións e movemento sociais do país”.

Para Espazo a situación social que Galicia está a padecer esixe de tódolos os esforzos posibles para situar na rúa a denuncia e a alternativa de cambio. As políticas de recorte non resolven á crise e só serven para manter os privilexios das grandes fortunas e dos especuladores, que son o goberno real da situación, en Galicia, no estado e en Europa.

Espazo está convencido de que ás manifestacións do vindeiro 27 de febreiro van ser masivas, e van ter continuación durante todo o ano. “ O goberno da Xunta de Galicia terá que tomar nota e mudar radicalmente de políticas. Na rúa vai ter as receitas para a súa acción política contra a crise,e se non está disposto a rematar cos recortes, mellor vai ser que comece a preparar a convocatoria de eleccións”.

Espazo tamén apoia as manifestacións que hoxe se celebran en apoio as Marchas da Dignidade do 22 de marzo.

Desde Espazo Ecosocialista consideramos necesaria a converxencia das mobilizacións para que a resposta adquira toda a forza necesaria para conseguir un xiro nas políticas de recortes sociais e democráticos.