O BNG denuncia o desmantelamento do servizo prestado polo 065 na Mariña

A Mariña, 13 de febreiro de 2014. O BNG mariñao denunciou o desmantelamento do servizo de transporte adaptado creado polo propio goberno nacionalista na etapa do bipartito coñecido popularmente como o 065, que ven prestando servizos de transporte a persoas con dificultades de mobilidade para achegalas a centros de día, así como a colectivos de persoas con capacidades diferentes que viñan facendo uso do servizo ate a actualidade.

Os nacionalistas calculan que na comarca, preto de duascentas persoas fan uso diariamente do servizo que prestan seis liñas de autobuses e microbuses adaptados que se verán reducidos a dous, impedindo por tanto atender a un número moi importante de persoas. O BNG acusou á Xunta de ser insensíbel coas persoas con mais necesidades e menos recursos, ás que castiga eliminando un servizo creado polo propio BNG na etapa do goberno bipartito na Xunta.

Dende o BNG explicaron que as seis liñas de buses que ate o momento traballan na comarca e que a Xunta pretende reducir a dúas, atenden a persoas dos concellos de Muras, Ourol, O Vicedo, Viveiro, Xove, Cervo, Burela, Foz, Alfoz, O Valadouro, Mondoñedo, Abadín, Trabada e Ribadeo polo que evidentemente será materialmente imposíbel atender a demanda existente na actualidade. Será materialmente imposíbel atender os servizos individuais de transporte regular de persoas maiores a centros de día e tampouco a colectivos con capacidades diferentes, transportados a centros de atención ou formación, que terán que buscar alternativas ou directamente prescindir das atencións sociais que ate agora disfrutaban.

Os nacionalistas ademais chamaron a atención sobre a perda de oito ou nove postos de traballo directos correspondentes a condutores e condutoras dos vehículos que prestan o servizo, aos que xa lles comunicaron – xa hai algún despedimento – que a partir do mes de marzo prescindirían dos seus servizos.