A A.C. Francisco Lanza de Ribadeo organiza un debate sobre Europa con varias organizacións políticas galegas

A A.C. Francisco Lanza de Ribadeo anima a todos e todas a participar nun debate sobre Europa que terá lugar o vindeiro mércores 30 de abril, ás 20,30 horas, na Casa das Letras de Ribadeo. Convidamos ás organizacións políticas galegas para que nos mostren que idea teñen de Europa. PP, PSOE, AGE, BNG e CxG vannos poder mostrar a súa visión de Europa, de que maneira afectan ás nosas vidas as decisións que se toman no seo da UE, e que poden facer por nós como representantes nosos que aspiran a ser no Parlamento Europeo. O debate vai ser moderado por Farruco GRAÑA, membro da directiva da A.C. Francisco Lanza, de Ribadeo.

Participarán:
PP: Jesús López Penabad, é enxeñeiro técnico forestal. Actualmente é presidente do PP de Ribadeo e coordinador sectorial de turismo na executiva provincial do PP de Lugo.

PSOE: José Ramón Val, licenciado en Ciencias Políticas pola USC, foi delegado provincial de Pesca na Xunta de Galicia. Foi tamén deputado na corporación provincial de Lugo, onde dirixiu a área de Economía do Coñecemento, Emprendedores e Innovación. Na actualidade desempeña o cargo de voceiro do grupo municipal socialista no concello de Foz e tamén é deputado no Pazo do Hórreo, onde é voceiro de Pesca.

BNG: Olalla Rodil Fernández: licenciada en Publicidade pola UVI. Xornalista e especialista en estudos internacionais. Redactora do xornal Sermos Galiza.

CxG: Paulo Carlos López, licenciado en Xornalismo e en Ciencias Políticas e da Administración pola USC. É membro do grupo de investigación CIDECOM da USC sobre cidadanía e comunicación. Colabora co Grupo El Correo Gallego e coa revista Tempos Novos.

Estaba prevista a presenza de Xose Luís Outes Ruso, catedrático xubilado de Teoría Económica da Universidade de Vigo, en representación de AGE (Anova-EU), mais problemas de carácter persoal de última hora impídenlle asistir ao debate.

Vaia desde aquí a nosa gratitude ás diferentes opcións políticas pola súa predisposición a participar neste debate e o noso ánimo a todas as persoas interesadas no debate público, neste caso en torno á idea de Europa, a participaren no mesmo.