Con grande e desbordante emoción se viviu a derradeira xornada da LNB da conferencia NorLeste en Remourelle onde quedou sobradamente demostrado que no deporte non se pode vender a pel do oso antes de cazalo.
Cos Billardeiros Musicais xa proclamados campións por equipos, quedaba saber se os primeiros clasificados en individuais, que dependían de si mesmos, eran quen de aguantar a presión e manter alonxados os seus rivais. A tarde nembargantes non lles foi propicia a ningún deles e tanto Daniel como Geni deixaron, moi o seu pesar, os primeiros postos aos seus compañeiros de equipo Juan e Reyes, respectivamente, que tiveron mellor día e non deixaron pasar a oportunidade de se converter en gañadores da tempada.
En varados pola contra, Santi sí se portou e desmostrou ser o mellor en tiros directos cerrando a tarde con dous novos varados que conseguiu na soleada pista de Remourelle.
Antes de comezar a xornada deportiva, a sede oficial da LNB NorLeste, “A Taberna de Lola” foi paseniñamente enchéndose de xente preparada para o xantar de irmandade que cerraba a tempada. Como ben decía Juan Pico, un dos precursores que axudou a prendela mecha do explosivo xogo-deporte da billarda, “para darlle o garabullo antes hai que enchelo bandullo” e este segue a ser o mandamento primeiro de todo billardeiro que se precie.
Así pois ben comidos, mellor bebidos e cos ánimos dispostos dirixímonos á pista de xogo para disfrutar da derradeira xornada da liga regular.
Perto de medio cento de xogadores dos once equipos en liza se dispuxeron á loita acompañados polo campión galego de ciclismo Rubén Sánchez, que logo de facer o saque de honra nunha das finais xogadas en Conxo, quedou prendido da billarda e non quixo perdela oportunidade de xunguirse á serpe multicolor da LNB e demostrou na pista que tampouco é manco co palán na man, gañándolle sendas carreiras ó intermitente Adrián e máis ó showman Rodrigo.
No deportivo, destacar as boas actuación de Franco, Juan e Coedo (Billardeiros Musicais) e de Pepe Vidal (O Cadaval), que acadaron pleno. Do desempate entre eles saíron os seguintes postos: 1º Juan, 2º Franco, 3º Pepe Vidal.
Os dez puntos de Juan permitíronlle por riba de gañar o Aberto do Coello, proclamarse campión individual da tempada cun punto por riba dos seus compañeiros de equipo Coedo e Daniel. En donas, Reyes desbancou a Geni do primeiro posto conseguindo o mesmo número de puntos ca ela e gañarlle no posterior desempate.
O Coello e máis unha artística figuriña artesanal feita por Muriego (El Viejo Pescador), foron os agasallos para o gañador do aberto. Segundo e terceiro clasificados levaron sendas ducias de ovos da granxa de Suso e un tarro de bonito de El Viejo Pescador.
Como fin de festa de novo na Taberna de Lola, uns viños e os tradicionais torreznos presidiron a entrega de premios ós campións da tempada. Trofeos xestionados polo concelleiro de deportes, Vicente Castro, que personalmente fixo a entrega os gañadores e dirixiu unhas calurosas verbas de ánimo para continuar adiante con este proxecto de recuperación dos xogos tradicionais.
A interpretación do himno da billarda puxo punto final ó acto.
Clasificacións finais:
Campión absoluto da tempada. JUAN (Billardeiros Musicais)
Campiona de donas: REYES (Billardeiros Musicais)
Campión de varados: SANTI (Carabullo de Teixo)
Campión equipos: BILLARDEIROS MUSICAIS, de Ribadeo.
O vindeiro 25 de maio voltaremos as pistas deportivas de Conxo (Santiago de Compostela) para disputar as finais nacionais cos campións das outras conferencias (Andaluza, Centro, NorOeste, Rías Baixas e Sur).
Bruno Arca, alumno de 1º Ciclo Medio de Cociña, acadou un 4º posto no Combiguru Challenge celebrado en Venecia os días 8 e 9 de maio. O concurso consiste en realizar unha serie de probas na APP da compañía, famosa polos seus fornos. Os seleccionados van a Venecia para participar no concurso no cal teñen que preparar un prato e unha sobremesa durante tres horas, sempre empregando os fornos da marca. Os dous días de concurso inclúen visitas guiadas pola cidade de Venecia e formacións con cociñeiros de prestixio como Paolo Casagrande, do Restaurante Lasarte de Barcelona con tres estrelas Michelin.
O viveirense será adxunto a presidencia e asesor do suízo Phip Waeffler no comité técnico internacional de Pentatlón Moderno para os vindeiros catro anos e co visto e prace da UIPM, onde se desempeña como Oficial de Operacións de Eventos e programa de formación de adestradores dentro da Unión.
O conselleiro do Mar visitou este venres a Feira Náutico Pesqueira que se celebra ata o sábado.
Este xoves recibíuse unha comunicación da Casa Real, felicitando pola consecución da Copa da Raíña 2025.
'50 anos de cultura - 50 anos de historia' pode verse nas Escolas Vellas de Cervo.
Unha cita á que a institución provincial achega 10.000€ para a súa organización e que reuniu a centos de persoas na Praza do Concello trabadense para degustar este prato típico do municipio. Carlos López destacou a colaboración da institución provincial a esta “cita senlleira, que pon en valor unha cultura gastronómica capaz de atraer visitantes ao noso territorio”. Destacou o traballo que fai o Concello mariñán por enxalzar este produto, tamén chamado faragullos que se elabora con touciño, ovos, leite, fariña e auga.
O delegado territorial da Xunta en Lugo, Javier Arias felicitou o pasado sábado, 3 de maio, a Reyco polos seus 30 anos de traxectoria no sector do transporte por estrada. Un exemplo de empresa lucense que medra con rigor, compromiso e aposta pola calidade "Desde a Xunta de Galicia seguimos apoiando ao sector con medidas para modernizar frotas, dixitalizar procesos e mellorar a formación dos profesionais". "O transporte é clave para o futuro económico de Galicia e empresas coma esta son parte dese avance", apuntou.
