A Xunta comunica a aprobación das contratacións anticipadas de socorristas nas praias

Lugo, 18 de xuño de 2014.- A delegada territorial da Xunta, Raquel Arias, comunicou hoxe que a Xunta facilita a contratación inminente de 68 socorristas para vixilancia e salvamento nas praias da Mariña de cara ao inicio da campaña de verán.

A Consellería de Traballo e Benestar ven de comunicar a todos os concellos que o solicitaron que xa poden proceder á contratación porque se autorizou a contratación anticipada por importe de 202.858 euros. Así, poden iniciar os trámites para a dotación de persoal os municipios de Barreiros, Burela, Cervo, Foz, O Vicedo e Xove.

Raquel Arias subliñou que na comarca da Mariña pediron a contratación anticipada todos os concellos do litoral salvo o de Viveiro, que non só non pide anticipo senón que nin sequera presentou solicitude de axuda para a contratación de socorristas, se ben o prazo para facelo aínda remata o 30 de xuño. Non obstante, non podería optar á contratación anticipada, posto que aínda non xustificou polo de agora a axuda recibida o pasado ano.

Igualmente, explicou, non é posible conceder a contratación anticipada ao concello de Ribadeo, pese a que si o solicitou, porque “tampouco xustificou a subvención do pasado ano para o mesmo fin, condición indispensable segundo establecen as bases da convocatoria dos plans de cooperación”.

A este respecto, a delegada lembroulles a ambos concellos que deben presentar a documentación xustificativa dos gastos do pasado ano; “xustificar o investimento subvencionado é un requisito que todo beneficiario de axudas públicas, sexa unha institución ou un particular, debe cumprir por lei”, apuntou.

As axudas da Xunta de Galicia permiten aos municipios da costa contar con persoal suficiente para a vixilancia das praias durante os meses de tempada alta, pero tamén benefician a municipios do interior que contratan persoal de salvamento nas piscinas, neste caso un total de 14 socorristas.

Así, en total a Xunta facilita a contratación nos vindeiros días de 82 socorristas, cun investimento global de 242.746 euros.