Santín anuncia que o PSOE esixirá nos 67 concellos á Xunta a modificación da nova lei de espectáculos por ser “impopular, innecesaria e cargar de traballo e custos aos organizadores”

LUGO, 9 DE XUÑO DE 2014.- Os alcaldes e voceiros socialistas presentarán nos 67 concellos unha moción conxunta, a través da que pedirán á Xunta de Galicia a adopción das medidas necesarias para a modificación da Lei 9/2014, de 19 de decembro, do Emprendemento e da Competitividade Económica de Galicia, eliminando do seu texto o artigo 41, apartado C, no que se refire á obriga das comisións de festas de obtención de licenza para a celebración de festexos populares.

Os socialistas levarán este asunto aos respectivos Plenos pois, tal e como indica o dirixente do Partido na provincia –Juan Carlos González Santín-, “esta é unha mostra clara dunha disposición legal innecesaria que, como nos ten acostumados o Goberno galego con moitas das súas normas, non só non resolve problema algún, senón que directamente crea un de enorme trascendencia”. Proba delo, asegura o secretario provincial é que afecta directamente, “e dun xeito moi negativo”, ao labor que desenvolven estas organizacións, xa que se ven obrigadas a levar a cabo uns trámites administrativos complexos e custosos diante dos concellos á hora de organizar, “dificultándolles así o seu traballo que, xa de por si, é complicado”, afirma o socialista.

Trámites excesivos e complexos
As comisións de festas teñen sido historicamente en Galicia o instrumento que tradicionalmente teñen creado os veciños para organizar os festexos das súas parroquias ou barrios. Calquera que tivera contrato cunha delas “sabe o moito esforzo e altruísmo que aportan os seus compoñentes á hora de facer realidade as necesidades dos seus pobos, sendo un exemplo claro de colaboración e participación cidadá á hora de atender demandas colectivas”. Por este motivo, González Santín critica decididamente “a excesiva burocracia e a complexidade do proceso imposto polo Executivo de Feijóo”.

Basta con dicir, subraia, que se lles obriga a presentar un proxecto, asinado polo técnico competente, no que se determine o axuste das festas á normativa urbanística e sectorial, e que estableza determinacións sobre prevención e seguridade en incendios. Os organizadores tamén teñen que presentar, entre outra documentación, un plans de emerxencias e de auto-proteción, así como un estudo de mobilidade xerada, de impacto acústico e de asistencia sanitaria.

Descoñecemento da Xunta
“Nin que dicir ten que a Xunta de Galicia ao impoñer estas obrigas, manifesta o seu descoñecemento da realidade das festas galegas, así como do xeito de organizarse e traballar das comisións veciñais, poñendo en perigo a continuidade destes actos populares”, afirma o secretario provincial.

E é que máis alá deste inxente prexuízo aos cidadáns, non é menor o problema que se lles causa aos sectores profesionais que se moven ao redor: orquestras e grupos musicais, axentes de espectáculos, feirantes, hostalería, etc. Só no mundo do espectáculo estes festexos manteñen 4.000 empregos en Galicia.

Por último, conclúe o socialista, “non podemos menosprezar os efectos negativos que xera esta norma aos gobernos municipais e ás súas estruturas administrativas, que se están vendo obrigados a aplicar unha disposición a todas luces innecesaria e impopular, cargándose, en tempos de penuria das arcas municipais, de máis traballo e custos”.