Uxía Senlle actuará o 28 de xuño no sexto encontro no Eido Dourado

Barreiros, 13 de xuño de 2014. O sexto encontro no Eido Dourado será o 28 de xuño e contará coa presenza da cantante galega Uxía Senlle, segundo daba a coñecer no día de hoxe o artista barreirense Celso Dourado.

Dourado contou que “o sexto encontro no Eido Dourado vaise celebrar o vindeiro 28 de xuño a partir das oito da tarde. Terá lugar, como sempre, nos xardíns que rodean o Eido, á carón da praia da Pasada, en San Miguel de Reinante (Barreiros)”.

A estrela convidada este ano é Uxía Senlle: “xa quedaramos outros anos, pero polo calendario tan apertado que ten esta muller non puido ser e neste pasado inverno buscamos a data para que estea con nós a voz senlleira do noso país: Uxía Senlle, que vai ser a grande protagonista do apartado musical do sexto encontro”.

Celso Dourado engadiu que “case tódolos anos nos encontros do Eido Dourado procuramos adquirir unha escultura e ese día inaugurala. Este ano vai ser dun moi recoñecido escultor da comarca do Bierzo: trátase de Domingo, que fixo para o Eido unha escultura moi simbólica, en madeira, e o 28 de xuño vai estar con nós para inaugurala no entorno onde vai estar situada. Nestes momentos precisamente estamos a acometer a instalación. Domingo vai ser presentado por outro escultor, o coñecido artista lucense Paco Pestana, que cooficiará de mestre de cerimonias”.

O artista barreirense indicou que “o encontro, que sempre facemos o último sábado de xuño, é un pouco o punto de partida da nova tempada do Eido Dourado. Xunto con Uxía van estar outra serie de artistas, tanto do mundo da música como do teatro e da poesía, que van facer que sexa unha tarde agradable. A partir de aí iniciarase a nova tempada de Eido Dourado e aproveitaremos para facer os concertos ao solpor, que sempre temos os domingos tanto de xullo como de agosto. Estamos cerrando a programación cultural correspondente a esta tempada no Eido Dourado”.