O alcalde de Foz denuncia que Xaime Cancio presiona ós traballadores da Área de Emprego do Concello durante os procesos de contratación de persoal

Foz, 18 de xullo de 2014. O alcalde de Foz, Javier Jorge Castiñeira, denuncia que o portavoz de Unifoz, Xaime Cancio, presiona aos traballadores da Área de Emprego do Concello durante os procesos de contratación de persoal.

“Queremos denunciar a actitude do señor Xaime Cancio, o portavoz de Unifoz, polo menos ata o día de hoxe, que está exercendo unha presión sobre os traballadores da Área de Emprego do Concello de Foz, que é verdadeiramente insostible. Leva toda a lexislatura, cando hai ofertas de emprego no noso Concello, sobre todo na época estival, cando hai ofertas de emprego para socorristas; cando hai obradoiros de emprego, como está pasando agora; cando hai ofertas de emprego en extinción de incendios e para condutores de motobomba; este señor está dirixindo á xente con seu nome, para que digan que veñen recomendados polo señor Xaime Cancio na oficina de emprego, e non o vamos admitir”, manifestou o rexedor municipal focense.

Javier Castiñeira engadiu que “a ningún concelleiro, nin do goberno nin da oposición do Partido Socialista nin do BNG, se lle ocorre presionar sobre a oficina de emprego e non vamos admitir que o señor Cancio siga presionando, como leva facendo todos estes anos, ao persoal da Área de Emprego. Aquí o emprego é completamente obxectivo, polos méritos, e non vamos deixar que este señor presione a ningún traballador do Concello. Igual o facía no seu momento cando era concelleiro do goberno pero dende que nós estamos gobernando o emprego é completamente obxectivo. E se quere algún documento que faga como o resto dos partidos: que llo pida ao alcalde e lle mostraron perfectamente cales son as bases e todos os documentos, porque son procesos totalmente claros e cristalinos. Pero non admitiremos nunca a presión dun concelleiro á hora de facer o traballo os funcionarios públicos”.