O Concello de Cervo reparte un novo lote de 20 composteiros e dá consellos sobre a súa utilización

Cervo, 9 de xullo de 2014- O Concello de Cervo continúa coa súa campaña de fomento da compostaxe doméstica, que se inclúe no proxecto municipal para o coidado do noso contorno e medio ambiente. Para iso a administración entregou 20 novos composteiros ao mesmo número de familias. O acto tivo lugar na Casa do Concello e nel participaron o alcalde de Cervo, Alfonso Villares, a edil de Medio Ambiente, Begoña Alonso, e Plácido Pérez, un veciño con moitos anos de experiencia nesta práctica e que sempre colabora co Concello dando pautas e consellos aos beneficiarios sobre o seu uso.

Hai que ter en conta que o proceso da compostaxe é sinxelo, pero hai algunhas cuestións básicas que se deben coñecer para conseguir un compost de calidade e útil para aboar as terras. Por exemplo, é por todos sabido que no composteiro hai que botar residuos orgánicos, como por exemplo restos de comida, pero non se aconsellan determinados alimentos como peixe ou carne. Tamén é imprescindible colocar o dispositivo nunha superficie de terra, nunca de formigón ou asfalto, e preferiblemente nunha zona con sombra.

Con esta última entrega son xa 130 as familias que recibiron un composteiro nestes anos e, polo tanto, decenas de fogares que reducen o volume do lixo que botan ao contedor, rebaixando tamén os residuos que ten que xestionar Sogama e en consecuencia o custo da recollida para as arcas municipais.

A edil de Medio Ambiente destaca “la buena acogida que tiene este programa de compostaje doméstico ya que todos los meses recibimos peticiones que atendemos periódicamente para que las familias que lo deseen puedan obtener un composteiro y aprovechar sus posibilidades”. Da mesma maneira Alonso quixo agradecer ás familias que practican compostaxe “su actitud respetuosa y cuidadosa con el medio ambiente, contribuyendo a valorizar los residuos orgánicos”.

O obxectivo do Concello é seguir fomentando esta práctica estendendo a compostaxe entre todas as familias que dispoñan dunha horta, un xardín ou un anaco de terreo. Para iso, aquelas persoas que aínda non dispoñan deste dispositivo poden solicitalo na Casa do Concello.