O rexedor ribadense insiste na necesidade de que a praia das Catedrais sexa declarada “Parque Natural”

Ribadeo, 10 de xullo de 2014. O alcalde, Fernando Suárez, insiste na necesidade de que a praia das Catedrais sexa declarada parque natural. O rexedor convidou á conselleira de Medio Ambiente a participar o vindeiro sábado, 12 de xullo, no acto de izado da bandeira azul do areal ribadense, momento que aproveitará para coñecer de primeira man os plans da Xunta para As Catedrais dos que hoxe se deu conta no Consello do executivo galego.

O rexedor aludiu a o anuncio do Consello da Xunta de hoxe “onde se acorda iniciar o trámite para facer un plan de conservación do monumento natural das Catedrais”. Para Fernando Suárez “é unha nota chea de boas palabras, en canto á regulación, á ordenación de todo ese entorno, pois parece moi positivo, pero o que precisamos é que isto se explique polo miúdo por parte da Xunta porque a delimitación actual da praia e do seu entorno máis inmediato, o que está desde hai nove anos declarado monumento natural, é a día de hoxe insuficiente ao non recoller as posibilidades de actuación de aparcamentos, de apeadeiros de Feve, de poder peatonalizar o acceso da estrada provincial no sentido de facer outra alternativa, etc…”.

O alcalde indicou que “si isto non se amplía sería unha frustración colectiva que nós non desexamos, de aí a proposta do Concello desde hai moito tempo e da Deputación tamén para a declaración de parque natural dunha zona moito máis ampla” . E engadiu que “en todo caso e sen desmerecer nada por todo isto quixemos convidar e convidamos, e así virá, á conselleira de Medio Ambiente para este vindeiro sábado para que nos acompañe no izado da bandeira azul da praia das Catedrais e así poder coñecer de primeira man, por boca dela, as intencións e os compromisos reais da Xunta para lograr que isto siga a ser un motor económico e un motor do turismo para Ribadeo e para a comarca e que os visitantes sigan a levar unha boa imaxe do areal, dos accesos, do entorno, do tratamento…”.