Lugo, 21 de xullo de 2014. O responsable da área de Cultura e Turismo da Deputación de Lugo, o nacionalista Mario Outeiro, presentou, este luns, os actos organizados pola Deputación lucense para celebrar esta semana o Día da Patria Galega. Entre os actos programados está a estrea este martes en Lugo da película Encallados, unha conferencia sobre O dereito a decidir e o Galeuzca, a cargo do historiador e profesor xubilado da Universidade de Deusto Xosé Estévez, que terá lugar o mércores no Refrectorio do Museo Provincial, e unha lectura pública o xoves pola mañá tamén diante do Museo do Sempre en Galiza de Castelao, coincidindo do 70 aniversario da súa poblicación.
Mario Outeiro presentou esta mañá este programa de actos acompañado por Alfonso Zarauza, director de Encallados, e María Yáñez, membro no equipo técnico do filme, que se estreará mañá martes día 22 en Lugo, proxectándose no salón de actos do Pazo de San Marcos, para logo facer unha xira polas vilas de Viveiro (30 de xullo no Conservatorio ás 20:00 horas), Mondoñedo (13 de agosto na Sala de Actos do Centro Comarcal ás 20:30 horas), Monforte de Lemos (19 de agosto na Casa da Cultura ás 20:00 horas) e Ribadeo (26 de agosto no Teatro ás 20:30 horas).
Encallados, que recibiu tres premios Mestre Mateo á mellor película para TV, á mellor dirección de fotografía e á mellor montaxe, é unha comedia rodada en Santiago de Compostela, en branco e negro, en 16 mm. Unha mirada ao noso cine e ao contexto no que vivimos chea de honestidade, autocrítica, melancolía e humor, coa catástrofe do Prestige de fondo. Unha película que nace a partir do fracaso de intentar facer outra, cando a Zarauza lle encargaran a realización dunha película sobe o Prestige, imposible de levar a cabo tendo en conta as condicións económicas e de traballo impostas. Profesionais do cinema lucenses como Luís Tosar, forman parte deste proxecto cinematográfico.
Neste sentido, a película narra os escasos seis días nos que o director, ao que lle dá vida Xulio Abonjo, se enfronta xunto con dous dos membros de Zopilote, os guionistas Xosé Castro “Pato” e Andy Mahía (interpretados por Ricardo de Barreiro e Federico López), a difícil tarefa de contar unha historia que lles toca tan preto sen caer en tópicos ou relatos prefabricados.
Distribución
A película estreouse a principios do mes de xuño a nivel galego, buscando unha distribución alternativa, “porta a porta”, con proxeccións en teatros, auditorios, centros sociais ou cinemas ao aire libre. E nesa distribución chega mañá a súa proxección á cidade de Lugo.
Durante a súa intervención, o responsable de Cultura da Deputación agradeceu a todo o equipo da película “por facernos máis coñecedores dun dos peores episodios da historia galega recente; un fito que fixo que a sociedade galega se erguera xerándose un dos movementos sociais e culturais máis importantes do país durante os últimos cen anos”.
Asemade, Mario Outeiro lembrou “o compromiso da área de Cultura da Deputación con esta causa, traendo, por exemplo, a Lugo e ás súas comarcas a mostra ‘Nunca Máis. A rebelión dun pobo’, que reflicte ese rexurdir da sociedade galega”; sen esquecerse “do noso apoio ao cinema feito na Galiza e en galego. Proba diso son as nosas colaboracións con festivais de cine de carácter local, a creación do espazo web cinemalugo.tv, ou o compromiso directo con filmes rodados en Lugo como a película Vilamor, ou A Esmorga, esta última rodada a principios deste ano no Pazo de Tor e nas súas inmediacións”.
Ficha técnica e artística
Dirección: Alfonso Zarauza.
Actores: Xúlio Abonjo, Federico Pérez, Ricardo de Barreiro, Farruco Castromán. Coa colaboración especial de Luís Tosar.
Produción executiva Luis Tosar, Farruco Castromán, Pizca Gutiérrez
Guión Alfonso Zarauza, Xosé Castro “Pato”, Andy Mahía
Dirección de fotografía Alberto Díaz Bertitxi (A.E.C.)
Dirección de arte Jaione Camborda Coll.
Son: Xavi Souto.
Axudante de dirección e xefe de produción: Pablo Atienza.
Montaxe: Adrián Pino.
Música: Robi C. Goday, Raquel Vilas Zarauza.
Unha película de ZircoZine distribuída por MrMisto.
Distribución: Xoán Mariño.
Comunicación: María Yáñez.
Deseño gráfico: Pablo Dávila.
Axenda actos Día da Patria
Martes, 22 de xullo (20.00 horas): estrea en Lugo do filme “Encallados”, de Alfonso Zarauza (Salón de Actos da Deputación)
Mércores 23 de xullo (20.30 horas): conferencia “O dereito a decidir e o GALEUZCA” con Xosé Estévez, historiador e Profesor xubilado da Universidade de Deusto (Refectorio do Museo de Lugo).
Xoves, 24 de xullo (12.00 horas): lectura pública do “Sempre en Galiza” de Castelao, no 70 aniversario da súa publicación (Museo de Lugo).






















Castro destacou o labor da Asociación e o potencial da tradición do ferro como motor económico, social e cultural para Riotorto, subliñando a importancia de impulsar iniciativas que garantan futuro para estes oficios. A Deputación de Lugo mantén unha colaboración estable coa entidade, cunha achega de 14.000 euros. No marco deste apoio, a Asociación avanzou na documentación dos oficios do ferro, catalogando ferramentas, técnicas e a historia das antigas “ferrerías de monte”.
O responsable provincial destacou "o traballo realizado pola organización ao longo destes anos para consolidar unha proba deportiva de primeiro nivel, que atrae tanto deportistas do máximo nivel competitivo como participación popular"
O grupo teatral O Centiño de San Martiño (Foz) actuou este sábado en Marzán, convidado pola asociación veciñal Torques de Marzán. O local quedou pequeno ante a resposta do público: 73 persoas, un récord de asistencia para unha obra de teatro na parroquia. A comedia provocou constantes risas e un ambiente moi participativo. A iniciativa volve demostrar o valor de levar actividade cultural e teatro afeccionado ás parroquias e barrios, achegando propostas escénicas a lugares afastados dos grandes circuítos. O Centiño continuará a xira de “O Autobús” nas vindeiras semanas: Sábado 25 de abril: Vilaronte (Foz). Sábado 2 de maio: Casa da Cultura de Trabada
A xornada contou con degustación gratuíta de viños elaborados por adegas da contorna, unha cata comentada e un mercado de produtos gastronómicos locais, permitindo aos asistentes coñecer de primeira man a riqueza do produto de proximidade. O pregón desta edición correu a cargo de Alejandro Gándara, quen presentou o seu proxecto audiovisual 360 curvas, unha obra que reflexiona sobre a distancia entre A Fonsagrada e Lugo e sobre o conflito social e político asociado á perda da súa condición de cabeceira de comarca, no marco da loita contra a despoboación.
Haberá degustación diaria de ostras na carpa do porto. Concertos, showcookings, visitas guiadas e actividades mariñeiras. Lancha pola ría, exposición de maquetas e concurso fotográfico #somoslasostra2026, ademais propostas especiais en Acueo, La Casilla e Restaurante Peñalba.
A etapa, cun percorrido duns 150 quilómetros, partiu arredor das 11:30 horas e rematou en Barreiros, atravesando concellos como Xermade, Muras, Viveiro ou Foz. A proba reúne a equipos do ciclismo profesional internacional e sitúa a provincia de Lugo como escenario dunha das citas deportivas máis destacadas do calendario. O Goberno colabora no desenvolvemento da carreira a través das Forzas e Corpos de Seguridade do Estado, que velan polo correcto desenvolvemento da proba e pola seguridade de participantes e afeccionados.
A cita contará con charlas, obradoiros, concurso de fotografía e unha ampla zona expositiva. A feira será de acceso gratuíto e está pensada para gozar en familia.



