Comezan as obras do saneamento dos novos vestiarios do campo de herba artificial da Marosa

Burela, 29 de setembro de 2014. Este luns deron comezo as obras de construción do saneamento do que serán os novos vestiarios do campo de fútbol de herba artificial da Marosa. O alcalde, José María González Barcia, xunto coa concelleira de Deportes, Beatriz Piñeiro, e o de Obras, Manuel Fernández Valle, estiveron presentes nos primeiros traballos que se realizan para dotar de saneamento aos novos vestiarios.

As obras contan cun presuposto 22.000 euros, e confíase en que estean rematadas en tres semanas. Sería a partires de ese momento cando o Concello podería abordar a construción dos vestiarios. “Desta actuación de saneamento informamos o pasado sábado ás directivas da AFD Porto de Burela e SD Burela”, afirmou González Barcia.

Beatriz Piñeiro, a concelleira de Deportes, manifestou que “desde o goberno municipal queremos que o complexo de A Marosa sexa dos mellores da comarca, e para iso hai que facer as cousas con sentido común. Non podíamos facer os vestiarios sen antes garantir o saneamento, dada a situación que terán”.

O responsable de Obras, Manuel Fernández Valle, indicou que “as obras consisten basicamente en colocar un punto de bombeo, ao que irán parar as augas residuais dos vestiarios, que derivará estas á rede xeral do concello. Tendo en conta que os vestiarios quedan por debaixo da cota da estrada Burela-San Cibrao, é preciso ese bombeo, e tamén foi preciso solicitarlle permiso á Deputación Provincial para atravesar a estrada, que é da súa propiedade”.

Por último, José María González Barcia manifestou que “ninguén pode negar o noso compromiso co deporte, pois aínda en momentos de dificultade económica nos comprometemos con novos servizos no complexo deportivo da Marosa, e como se pode comprobar estamos cumprindo. E nas vindeiras semanas haberá máis noticias positivas para o deporte en xeral e para o recinto da Marosa en particular”.