“Novas clases, máis profesores e taxas máis baixas” neste curso da Escola de Música de Burela

Burela, 22 de setembro de 2014. A última hora da tarde deste luns tivo lugar o acto de presentación do curso 2014-2015 da Escola Municipal de Música de Burela, no que participou o alcalde, José María González Barcia, xunto coa concelleira de Educación e Cultura, Mónica Pedre, e o director da Escola, Xan Carballal.

Durante o acto, ao que acudiron pais, nais e alumnado, e que tivo lugar na Casa da Cultura, González Barcia ratificou o compromiso absoluto do goberno municipal coa Escola Municipal de Música e co proxecto que na mesma se está a levar a cabo. O rexedor dixo que “en momentos de dificultade, de mala situación económica, fomos capaces de baixar as taxas de matrícula da Escola, para facilitar o acceso á educación musical a máis persoas, e fomos quen de aumentar o profesorado da Escola, para aumentar e mellorar a calidade da oferta educativa”.

O alcalde reiterou o total apoio ao proxecto que se leva a cabo na Escola Municipal de Música: “ten demostrado a súa eficacia con abundantes exemplos individuais e colectivos, e o que temos que facer entre todos é continuar apoiándoo e mesmo potencialo se cabe”.

José Mª González Barcia manifestou que este ano “introducirase unha materia nova, a de canto, como experimental, pero de cara a darlle absoluta continuidade. A colaboración entre ASUEMBU e o goberno municipal propicia esta nova materia dentro da oferta educativa da Escola Municipal de Música, polo que quero agradecer a disposición absoluta e permanente de ASUEMBU para facer máis cousas e mellores pola Escola de Música”.

Igualmente, o alcalde asegurou que “durante o curso que agora comeza, se poñerán en marcha novos proxectos educativos de carácter musical que nacen na propia Escola Municipal de Música, e que seguro que terán unha moi boa acollida entre a xente da Escola en particular e entre a cidadanía en xeral”.
O curso comeza coa plantilla de profesores ao completo. O número definitivo de alum@s coñecerase cando remate o prazo de matrícula a finais de setembro, “pero a día de hoxe o ritmo de matriculación marcha segundo previsto”, indicou o alcalde.