Alternativa Galega de Esquerda critica que os orzamentos do Estado para Lugo esquezan as necesidades reais da cidadanía

Santiago de Compostela, 1 de outubro de 2014.- Segundo Alternativa Galega de Esquerda (AGE), o Estado reserva para Lugo un novo ataque ás condicións de vida das traballadoras e traballadores. “Estas contas impiden albiscar a saída para unha crise brutal”, denuncia o deputado Ramón Vázquez, “nin a posibilidade dunha vida digna para a cidadanía de Lugo, unha provincia onde case a metade da poboación sofre carencias materiais severas”. As necesidades reais da xente fican, unha vez máis, esquecidas. “As lucenses e os lucenses precisan pan, teito e traballo, e non cemento e tixolos”, resume Vázquez.

O gasto previsto polo Estado –que adoito, por outra banda, queda sen executar- para o ano 2015 na provincia de Lugo relegan o gasto social e céntranse nas autovías a Compostela e mais a Ourense. “O Goberno de Rajoy, co asentimento de Feijóo, prioriza as grandes infraestruturas sen planificación territorial ningunha”, engade, “e reduce o gasto social e os servizos sociais básicos nun contexto en que a cidadanía pasa pola peor situación da historia recente”. Exemplos gráficos son as partidas destinadas a prestacións por desemprego ou a política de vivenda, que baixan un 15% e un 26%, respectivamente. “E isto acontece cando na provincia hai máis de 22.000 desempregadas e desempregados e milleiros de cidadáns e cidadás que non poden acceder a unha vivenda”, apunta.

“Diñeiro para obras a costa das prestacións sociais básicas son o resumo destes orzamentos para o 2015”, conclúe Ramón Vázquez.