O Concello de Foz mellora a praza Pardo de Cela cunha subvención da Xunta de Galicia

Foz, 24 de novembro de 2014.- O Concello de Foz está a rematar estes días os traballos de reforma e mellora da Praza Pardo de Cela, situada na rúa Paco Mañón, na zona antiga da vila. As obras consistiron na humanización desta praza e puideron levarse a cabo cunha subvención da Xunta de Galicia. Grazas a ela o Concello instalou unha fonte de pedra, así coma unha serie de bancos e xardineiras para facer desta praza un novo espazo dinamizado.

O alcalde, Javier Jorge Castiñeira, explicou que “estanse a rematar os traballos de mellora da Praza Pardo de Cela, situada no entorno da Igrexa, na zona antiga de Foz, na rúa Paco Mañón. Estase adecuando unha praciña moi característica do noso pobo, que durante todos estes anos se utilizaba exclusivamente para aparcamento dos veciños e que é un espazo moi querido e moi interesante. O que fixo o Concello, grazas á subvención da Xunta de Galicia, foi humanizalo o máis posible e tratar de que ese espazo se poida usar non só para os coches, senón tamén para as persoas e para o ocio de tódolos focenses”.

O responsable municipal explicou que “instalouse unha fonte de pedra, así coma unha serie de bancos e xardineiras que humanizan ese entorno. A praza pertence á zona antiga de Foz e do que se trata é de dinamizar un pouco esta zona, que ata o de agora non o viña estando. Por tanto, estamos contentos, esperando o remate dos traballos e, por suposto, agradecemos á Xunta de Galicia o seu financiamento desta obra importante, que aínda sendo pequena a inversión creo que o efecto vai a ser moi interesante”.