Os socialistas esixen modificacións no Plan de Xestión da Sardiña

Santiago de Compostela, 14 de xaneiro de 15. O portavoz de Pesca do Grupo Socialista, José Ramón Val, presentou unha serie de iniciativas parlamentarias para que o Goberno galego aplique ao Plan de xestión da sardiña as propostas da Comisión Sectorial do Cerco do Consello Galego de Pesca. Lembra que o PP se ten comprometido a defender estas propostas, sen que a día de hoxe conseguira modificar o dito Plan de xestión.

Así, Val reclama que se establezan topes diarios e paradas subvencionadas para a pesca de sardiña, así como a inclusión da coñecida como zona VIII b, nas mesmas restricións que o resto da flota do Estado e Portugal. Ata o momento, engadiu, tanto o PP como o goberno galego teñen acadado un “fracaso total e absoluto” á hora de cumprir con estes compromisos.

O deputado socialista sinala que a xestión do goberno está a permitir que cada vez se reduzan mais as posibilidades de pesca para a flota do cerco, nomeadamente en Galicia, onde 154 embarcacións traballaban na sardiña a comezos do pasado ano. O PP está a “castigar duramente” co seu desleixo a un sector, o da pesca, que ten perdido 5.000 traballadores e traballadoras dende 2009.

Censurou o trato discriminatorio con respecto á flota de Euskadi, exenta das restricións que afectan ao resto da Península e que en 2014 descargou tanta sardiña como o resto da flota do Estado e de Portugal xuntas. Naquela campaña capturaron 14.000 toneladas cunha facturación de mais de 10 millóns de euros, ao tempo que acumulan dereitos históricos de pesca para o futuro.

Esmola para o xeito
José Ramón Val criticou así o “fracaso absoluto sen paliativos” da xestión do PP, incapaz de manter os seus propios compromisos nin sequera co sector do xeito, inxustamente afectado polas restricións da UE contra esta arte tradicional absolutamente respectuosa co resto das especies.

A pesca do xeito contará cunha reserva de 200 toneladas anuais en total, o que en realidade resulta “unha esmola” que non garante en absoluto a súa continuidade e que evidencia que tanto o PP como os gobernos que defende “estanse a rir dunha arte de pesca “selectiva, centenaria e fráxil”, que abrangue a tan só 500 embarcacións situadas “na vía do exterminio”.