Begoña Alonso lémbralle a Lara Méndez que a Deputación tamén está no Padroado “a pesar de que sempre chega coas mans baleiras”

Cervo, 18 de febreiro de 2015.- A edil de Cultura, Begoña Alonso, asegura “non entender a Lara Méndez”, que participou na última reunión do Padroado de Sargadelos que tivo lugar este martes na que a Xunta anunciou 30.000 euros para o Conxunto Histórico Artístico e na que Méndez “se limitou a criticar, a pesar de representar á única administración que aínda non aportou nin un só euro a Sargadelos”. “Só a Deputación é capaz de chegar a todas as reunións coas mans baleiras e criticar aos que traen inversións”.

Alonso lémbralle a Méndez que “a Deputación tamén está no Padroado e, polo tanto, tamén pode facer inversións ou, en todo caso, apoiar ás administracións que si destiñan diñeiro a Sargadelos”. De todas formas, a edil asegura que “entendemos que non dediquen diñeiro á cultura e o patrimonio do noso concello, xa que as súas prioridades están en, por exemplo, o gasto de 3 millóns de euros para o Torques de Burela e outras pezas”.

A edil asegura que a Deputación “sigue fiel á súa estratexia de non dar nada a Cervo e aínda por riba criticalo todo”, ao igual que fixo con “numerosos proxectos da súa competencia como os accesos ao polígono de Cuíña ou a ampliación do Museo do Mar”. “A Deputación sepulta co seu NON permanente todas as necesidades dos veciños de Cervo” remata Alonso.