O BNG de Foz chegou a un consenso para facer un plan de emprego no concello e algunhas obras de inversión

Foz, 18 de febreiro de 2015.- O BNG de Foz chegou a un acordo co grupo de goberno e os concelleiros non adscritos para darlle unha finalidade ao remanente de 220.000 euros que quedou da amortización de créditos e do fondo de continxencias, unha vez aprobados os orzamentos deste ano. O BNG abstivérase na aprobación dos orzamentos nun exercicio de responsabilidade, para telos actualizalos e porque se recollían algunhas das propostas feitas desde o noso grupo.

En canto ao Plan de Emprego, o BNG pediu que este plan estivera o máis repartido posible en todos os aspectos (prazas, idades,…), que cumprira cos principios de igualdade e obxectividade á hora de acceder ao postos de traballo ofertados e que se reserven prazas para discapacitados/as. En canto as prazas, que se cubriran 2 prazas de axuda no fogar, 1 de mecánico, 1 de medio ambiente e outra de administrativo. O BNG fixo moito fincapé en que as bases para cubrir as prazas sexan o máis consensuadas posibles, que dean oportunidade de acceso ao maior número de persoas e que garantan a obxectividade das probas a través de mecanismos como sorteos, temarios públicos, exames custodiados e outros.

Respecto ao Fomento do Emprego en empresas, o BNG defendeu que foran o máis repartidas posibles entre os diferentes sectores empresariais do concello (electricidade, comercio, mecánica, hostalaría, perruquerías, deseño,…).

No apartado de Inversións, o BNG propuxo que se reservara unha partida para reparar e arrombar os parques infantís e areas recreativas do Concello así como outra para a correcta sinalización (horizontal e vertical) no Concello, tanto en vila como en parroquias.

O BNG está convencido que os plans de emprego non son a solución ao problema do paro senón que a solución está na reactivación económica e en políticas activas de creación de emprego, sobre todo nos sectores produtivos estratéxicos galegos e na pequena e mediana empresa, cousa que o goberno da Xunta non está facendo. Non por iso imos deixar de apoiar un plan municipal que lle dará traballo durante varios meses a un número importante de persoas. Desde o BNG, tamén queremos destacar a boa disposición por parte de todos a chegar a un consenso e esperar que todo o acordado se leve a cabo no menor tempo posible.