Rodas acusa a Feijóo de ir facer unha “foto” a Bruxelas e aproveitar as xestións do BNG sobre o xeito no Parlamento Europeo

Santiago de Compostela, 03 de febreiro de 2015. O portavoz de pesca do BNG, Daniel Rodas, ven de cuestionar a viaxe do presidente da Xunta de Galiza, Núñez Feijóo lamentando que o fixera cando todo está decidido. É unha pena, asegura, que non fora ao Parlamento europeo antes de ter rematado o ano para impedir a aplicación do actual modelo de reparto de especies peláxicas como a xarda, que condena a flota galega a desaparición.

Este ano, explica o deputado, dun TAC de 1 millón de toneladas á flota do cerco galego, a maior número de toda Europa, correspóndelle 2.600 toneladas, “unha ruína para o sector sector”. A modo de exemplo, un barco do cerco hai poucos anos podía pescar 8.000 quilos de xarda cada día e agora co novo reparto correspóndelle 3/8/10/25.000 quilos por ano.

Nulo intereses de Núñez Feijóo polos problemas do sector
Por outra parte, o Presidente da Xunta, engade Rodas, tampouco se interesou nin xestionou nada para impedir que haxa un descenso dun 26% nas cotas do xurelo na zona Ciem VIIIc e un aumento do 70% na zona Ciem IXa, cando Galiza é toda unha.

A nosa flota está atravesando unha situación dramática sen posibilidades de poder pescar xarda, nin sardiña e con escasas capturas para o xurelo na zona do cantábrico e sendo literalmente acosada polos corpos de inspección e seguridade. Mentres se afoga o sector, o presidente da Xunta vai de visita coa señora conselleira de Pesca por Bruxelas sen enfrontar ningún dos graves problemas que está a arruinar estas economías familiares.

Feijóo aproveita o camiño iniciado polo BNG en Bruxelas
E dado que o noso presidente non ten rubor en contradicir o que xa ten confirmado a Comisión Europea, por escrito, recoñecendo: “que os contactos celebrados coa delegación de representantes do xeito, “organizada polo BNG o pasado mes de decembro”, foron determinantes para obter información sobre as consecuencias de incluír a esta arte de pesca artesanal na prohibición de redes de deriva e corrixir esta decisión”. E dada a boa disposición do Comisario de Pesca, Feijóo, recalca o nacionalista, puido aproveitar para emendar a “falta de información” que tamén acontece coas actividades pesqueiras desenvolvidas nas augas continentais de Galiza na que existen diferentes artes de deriva como o “trasmallo do Miño”; a “lampreeira”; a “muxileira”, a “varga da solla”, ou a “varga do muxo”, que ata agora ninguén informou de que existen nin a ninguén lle preocupou que poidan prohibirse.

O sector síntese “traizoado” polas decisións políticas de Madrid, Bruxelas e Galiza
O BNG celebra que se teña invitado ao Comisario de Pesca a visitar o noso País, pero estamos escandalizados do “escaso interese” do presidente galego polos graves problemas do sector. “O noso presidente é cómplice na perda de empregos, na destrución de actividade económica e no roubo dos dereitos históricos que temos os galegos a poder pescar e a poder exercer este traballo con dignidade”.

Con esta visita, os armadores galegos, os propietarios de pequenas embarcacións e os traballadores do mar non poden sentirse acompañados polo presidente neste temporal, que non é provocado pola natureza se non polas decisións políticas que se adoptan en Bruxelas, en Madrid e na Galiza. “Sentímonos traizoados”.