Estaban os amantes do suspense devecendo para que as listas electorais tardasen un chisco máis en seren publicadas cando o BNG decidiu dar un golpe enriba da mesa. Non optou por asinar ao seu equipo titular, senón todo un plantel de vintecinco integrantes. Unha presentación por todo o alto. Tanto, que incluso algún deles levitaba.
Parece que foi onte cando aquel rapaz de trinta e un anos deambulaba polo Pazo de Ibáñez facendo as veces de tenente de alcalde. Un cargo que o acabaría premiando coa alcaldía en 2007. Hoxe, aquel ‘homiño’ segue a liderar unha candidatura do BNG malia o momento de incertidume que atravesa a executiva do partido e tras ainar un manifesto criticado por algúns sectores ‘duros’ da executiva nacional. A formación local en Ribadeo, pola contra, parece gozar de boa saúde.
O pasado venres o BNG poñía a guinda a unha semana auto reivindicativa amosando as caras do seu proxecto para os comicios do mes de maio. Durante os días previos, o partido nacionalista buzoneara polo Concello os primeiros vestixios de propaganda pre electoral. Neste documento, recordaba aos veciños os aspectos máis salientables da xestión durante o seu mandato con maioría absoluta. Para culminar estes logros, o Parador de Turismo acolleu a presentación dos vintecinco integrantes da candidatura nacionalista.
Fernando mantivo á súa xente de confianza e non tocou aos tres que lle seguían na lista do 2011: Mari Luz Álvarez Lastra, Vicente Castro e Ana Martínez. Con todo, relega a uns probablemente desgastados Horacio Cupeiro (undécimo na lista) e Teresa González (duodécima). Da lista das eleccións pasadas, só se bota en falta a Xavier Campos quen, por motivos de traballo, decidiu que compaxinar o seu labor na executiva nacional coa política local suporía un lastre máis ca un incentivo. Sabia decisión.
As caras novas, combinando mocidade e veteranía, activismo estudantil, xuvenil e social cos aspectos urbano e rural fan da lista unha candidatura sólida de cara as municipais. Ademais, a lista cremalleira –combinando home-muller e, así, ata o último suplente– tamén supón un factor clave xa que demostra que unha lista formada igualmente por homes e mulleres é algo máis ben lonxano a ese termo tan empregado hoxe en día na política: utopía.
Por último, a temporalidade. O feito de amosar as cartas antes ca ninguén cando semella que o resto de forzas locais están tendo dificultades para confeccionar unha lista de vinte persoas (incluindo suplentes) non pasa desapercibido. Este golpe, adiantándose a calquera fichaxe, incorporación en masa ou lista que puidesen anunciar PP ou PSOE non está exenta de carga estratéxica.
Iso sen mencionar a Cidadáns, partido que acaba de se asentar sobre a estructura de UPRI e que xorde coma resultado do contaxio a nivel español que supón Albert Rivera; ou a Ribadeo en Común, inspirado nas formacións emerxentes pola xeografía estatal e que agrupa a diversos colectivos reivindicadores dunha maior transparencia e participación, pero que aínda precisa reunir 500 avais para garanter a súa candidatura.
Ante este panorama, o BNG acaba de posar para unha foto exibindo músculo. Unha foto que amosa que non houbo apenas problemas para acadar os dezasete integrantes da lista e que, a falta de tres suplentes –como podería ser habitual– outras oito persoas tamén se sumaron á lista nacionalista. Vintecinco persoas alternando homes e mulleres a partes iguais. Vintecinco persoas que foron as primeiras en dar a cara ante os medios de comunicación. Para que logo digan que a maioría absoluta pode desgastar.
O mensaxe é claro: ‘aquí vos esperamos’. E a resposta do resto dos partidos políticos, se se queren auto proclamar coma os partidos da xente, terá que ser non amilanarse e contraatacar. A estratexia electoral está servida, a partida acaba de comezar…
Fabián Pérez Rego
O programa inclúe inscricións, concertos, exhibicións, rutas e exposición de vehículos. Con motivo do evento, haberá cambios temporais de tráfico no casco urbano, con prohibicións de circulación e estacionamento en varias rúas e modificacións de sentido. O Concello pide á veciñanza que respecte a sinalización para garantir o correcto desenvolvemento das actividades.
A piscina abrirá de luns a venres de 8:30 a 13:00 e de 15:30 a 22:00, e os sábados de 8:30 a 14:30. O ximnasio manterá horario continuo de luns a venres, de 8:30 a 22:00, e os sábados de 8:30 a 14:30. A tempada arrinca tras diversas melloras nas instalacións, entre elas a renovación da cuberta do polideportivo, cun investimento de 195.000 euros, así como a substitución de portas de emerxencia, a intervención en pontóns das piscinas e o cambio das huellas de volteo. O Concello continúa así reforzando o mantemento e a seguridade dun complexo utilizado diariamente por numerosos veciños e deportistas.
Este luns, 14 de setembro, visitaron Mondoñedo, a Praia das Catedrais e Santa Cruz. A viaxe evocou as lecturas de Cunqueiro e as súas Crónicas do sochantre, nun percorrido que incluíu a catedral mindoniense e o barrio dos Muíños, ademais da emblemática praia de Augas Santas. Pola tarde participaron nunha exhibición de billarda grazas á estimable colaboración dos billardeiros da comarca. O martes partiron de regreso a Loktudi.
A conselleira do Medio Rural, María José Gómez, acompañada pola directora xeral de Relacións Institucionais e Parlamentarias, Sandra Vázquez, e a directora xeral de Urbanismo, Encarnación Rivas, asistiu á ofrenda da Virxe dos Remedios en Mondoñedo.
O director xeral agradeceu aos membros e traballadores da entidade todo o seu labor na defensa dos dereitos dos máis novos. Deste xeito, puxo en valor a súa traxectoria e o compromiso cun modelo integrador e inclusivo no que os menores do sistema de protección vivan nunha contorna totalmente familiar. Neste sentido, Jacobo Rey fixo fincapé na importancia da colaboración entre a Xunta e o tecido social para seguir fortalecendo un sistema que garanta o benestar dos nenos e adolescentes, con centros como San Aníbal que conforman un auténtico fogar.
Na IV Festa dos Ovos Rotos con Chourizo e Feira de Artesanía, María José Gómez puxo en valor a importancia económica e social deste produto e o papel da artesanía alimentaria, con sete operadores presentes. Subliñou que o evento consolídase como unha cita que promove a gastronomía galega e recupera oficios tradicionais, dinamizando a vida económica e social de Castro de Rei.
Este luns, 14 de setembro, deu comezo un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
