Un cento de xinetes percorrerán o municipio de Cervo a cabalo na VII Ruta do Poldro

Cervo, 10 de abril de 2015- A Ruta do Poldro chega este ano á súa sétima edición. Un evento que organiza a asociación Cabaleiros do Xunco coa colaboración do Concello, que xuntos presentaron o cartel e os detalles da ruta que terá lugar este domingo 12 de abril. Ao acto asistiu o alcalde, Alfonso Villares, o edil de Zona Rural, José Ramón Soto, o presidente de Cabaleiros do Xunco, Julián Otero, e outros membros da asociación.

Unha ruta na que participarán sobre 100 xinetes chegados de diferentes puntos de Galicia, de forma que se mantén estable a afluencia de edicións anteriores. Trátase dunha cita que sempre se celebra no mes de abril e que conta con moitas persoas e agrupacións habituais, que volven todos os anos.

A ruta comeza ás 1.:30 horas con saída do polígono de Cuíña en dirección a Pedrosa, Río Covo, Castelo (onde haberá un avituallamento), Gondrás, Lieiro e San Ciprián, e con remate de novo no polígono de Cuíña, onde se celebrará un xantar de convivencia.

Dende o Concello agradecen a Cabaleiros do Xunco “que poña en marcha esta actividade, porque hai que ter en conta que hai moitos xinetes que veñen doutros concellos e doutras provincias e, polo tanto, esta é unha boa oportunidade para amosarlles o noso concello” explica Soto. De feito, o percorrido é longo, de 20 quilómetros nos que “os participantes van poder coñecer e gozar da nosa paisaxe e da nosa natureza”.

Hai que recordar que esta asociación pon en marcha diversas actividades ao longo do ano, como é o caso da Feira do Gando, no mes de maio, coa que Cabaleiros do Xunco recuperou unha cita tradicional que deixara de celebrarse. Sen esquecer as exhibicións de monta e as probas de equitación que organizaron o ano pasado.