A AAVV Cervo-Sargadelos agradece á Deputación o seu apoio para a colocación de varandas nas rúas Igrexa e Lobeiras e o arranxo do camiño dos Currás

Cervo, 16 de maio de 2015.- O Presidente da Asociación de veciños Cervo-Sargadelos, Manuel Facal, anunciou na mañá deste domingo que “por fin será posible levar adiante a colocación de varandas na rúa da Igrexa e rúa das Lobeiras, en Cervo, e o arranxo do camiño dos Currás, na Senra, grazas ao apoio económico da Deputación de Lugo”.

Facal lembrou que estas actuacións obedecen a vellas reivindicacións dos veciños, “hai polo menos catro anos, lográramos comezar estas obras, pero ao final todo quedou en nada. Dende aquela, solicitamos unha e outra vez a súa continuidade pero nunca conseguimos resposta definitiva”.

Neste senso, dende a asociación destacaron que “levamos chamado a moitas portas para facelo posible, pero sempre se nos deu as costas. Incluso o Concello de Cervo, con competencias reais para esta materia, tivemos o silencio por resposta”.

Tras máis de catro anos de loita, a Deputación de Lugo fará posible estas actuacións e por iso, e en nome de todos os membros da asociación, o seu Presidente, Manuel Facal, rematou subliñando que “agradecemos públicamente o apoio do ente provincial xa que sen a súa axuda estas obras que imos levar adiante non serían posibles”.