O Centro Comercial Aberto de Foz entregou os premios aos gañadores da XII Ruta de Tapas

Foz, 1 de maio de 2015.- O restaurante Xoiña, de Foz, acolleu este xoves á noite a cea anual de ACIA/CCA e a entrega dos premios aos gañadores da XII Ruta de Tapas celebrada o pasado mes de abril. Ou Peirao Bar, Cafetaría Pastelaría Anduriña, Fraggle Rock café e Bar 78 foron os premiados, que recibiron un diploma e unha figura. Un xurado especializado decidiu que a tapa do Peirao Bar “Niguiri de tartar de sargo con allos tenros” fose a gañadora da XII Ruta de Tapas. O segundo posto foi para o “Gelée de albariño sostendo unha salsa de marisco e algas con pescada, rematada con triscante de gambas” de cafetaría pastelaría Anduriña. E o terceiro lugar foi para o “Bacallau confeitado en crema de pemento e o seu pil pil” de Fraggle Rock café. Pola súa banda o público, a través da APP Foz de Perlas, elixiu como mellor tapa o “Almorzo montañés” de Bar 78.

Na quenda de intervencións o presidente do ACIA/Centro Comercial Aberto de Foz, José Carlos Paleo, destacou “a colaboración que tivo o equipo de goberno co ACIA focense nas máis de 200 actividades realizadas ao longo dos últimos catro anos, unhas por iniciativa do goberno local como a posta en valor da zona portuaria e de Islanova, e outras nas que traballamos conxuntamente para prolongar máis o verán en Foz. Agora o último fin de semana de agosto é o máis rendible e valorado polo comercio e a hostalaría coa creación da Festa Normanda. Non pode esquecérsenos o penúltimo fin de semana coa Feira Multisectorial ou a Festa Vintage”. Paleo subliñou que “o broche a este último ano foi o apoio para converternos en Centro Comercial Aberto, o traslado das oficinas ao Cenima e o convenio asinado co Concello por importe de 15.000 euros para a súa posta en funcionamento. Sentamos as bases para seguir mellorando o comercio, a hostalaría e en definitiva o noso pobo”.

O alcalde de Foz, Javier Castiñeira, sinalou que “un pobo o fan os veciños, os negocios, o comercio e a hostalaría”, destacou “a colaboración conxunta e o traballo realizado por ACIA/CCA Foz nos últimos anos” e tamén incidiu en que “antes o verán se remataba despois das festas de San Lorenzo e agora conseguimos prolongalo, co que iso supón, ata finais de agosto,”. Castiñeira dixo que “somos o Concello máis dinámico e con máis actividade da Mariña. E non o dicimos nós coméntannolo a xente que chega doutros municipios a gozar das propostas que encontra en Foz”. O rexedor tamén aludiu á creación do Centro Comercial Aberto “que lle permitirá á vila acceder a unha liña de subvencións para seguir dinamizando e mellorando a súa zona comercial”.

A reunión estivo amenizada polo cantante Luis Rey, que deleitou aos asistentes con cancións de Frank Sinatra, Elvis ou Raphael, entre outros.