Son Viveiro aposta pola sostibilidade ambiental

Viveiro, 21 de maio de 2015.- A creación da Concellaría de Medio Ambiente é un dos nosos puntos fortes do programa onde recollemos varias propostas neste eido. Cremos profundamente que unha xestión organizada e sostible dos recursos que conforman a nosa paisaxe poden ser unha alternativa máis na creación de emprego. Unha “nova” economía que veña a través dos diferentes aproveitamentos que estruturamos nestes tres conceptos:

· Produtivo; temos que sacarlle o máximo rendemento ao noso mar e aos nosos montes con políticas que faciliten a creación de iniciativas que traten de aproveitar ao máximo os nosos recursos. Apostar pola diversidade para un mellor e variado aproveitamento da nosa terra e pola transformación dos produtos do mar.

· Recreativo; vivimos nun lugar privilexiado para apostar polo deporte e polo turismo en xeral. Dende o chamado “turismo de aventuras” ata o “gastronómico” pasando polo “turismo de praia”, “deportivo” ou “rural”. O que todos teñen en común é que para poder sacarlle un maior rendemento debemos tratar ao noso patrimonio natural como se merece. Recuperando e sinalizando debidamente os camiños, apostando polos nosos produtos, saneando e mantendo as rías e os ríos e dotando de medios para gozar a natureza a aquelas e aqueles que escollan Viveiro para a práctica de deportes ao aire libre ou o descanso.

· Ambiental; sen dúbida é o concepto máis abstracto dos tres. Debemos atopar a equidade ambiental e social cando falamos de aproveitar os nosos recursos. Non se trata de esquilmar e degradar a nosa contorna, temos que ser conscientes da responsabilidade que conleva preservar o Medio Ambiente para as vindeiras xeracións e de que, como seres vivos, é preciso manter unha saúde ambiental óptima para poder desenvolvernos sen riscos para a nosa propia saúde.

Estes conceptos tamén son aplicables ás zonas urbanas das vilas, coma a nosa, onde a burbulla inmobiliaria deixou “pequenas illas verdes” entre as edificacións e que agora, co azoute da crise, se ven ocupadas como hortas para autoconsumo. Desde SON VIVEIRO, cremos na necesidade de xestionar estes espazos para crear zonas verdes, zonas de esparcemento para os cans e os seus donos e donas e unha rede de hortas urbanas para garantir que se leven a cabo prácticas o máis ecolóxicas e sostibles posibles a través de campañas, xornadas e actividades que xiren neste sentido.

A creación da Aula da Natureza que propoñemos xogará un papel importantísimo na xestión, en liñas xerais, de todo o exposto ata ao momento. Tamén se encargará de recoller, amosar e informar dun xeito didáctico todo o potencial que posuímos no noso territorio, xa que contamos con poder poñelo a disposición, sobre todo, dos centros educativos.