Ata o 15 de setembro está aberto en Burela o prazo para solicitar o tícket eléctrico social

Burela, 10 de xullo de 2015.- A concelleira de Servizos Sociais, Patricia Otero, informa que está aberto o prazo para solicitar axuda económica para o pago de parte da factura eléctrica a través do tícket eléctrico social de Galicia. A contía das achegas oscilará entre os 90 e os 150 euros. A este máximo chegarán as familias, que ademais de cumprir todos os requisitos, acrediten que son familia numerosa.

Segundo informa a concelleira de Servizos Sociais, Patricia Otero, “ata o 15 de setembro de 2015 está aberto o prazo para solicitar axuda económica para o pago de parte da factura eléctrica a través do tícket eléctrico social de Galicia (Resolución do DOG número 43 do mércores 4 de marzo de 2015). A axuda é de 90 € semestre para as unidades de convivencia que cumpran os requisitos e de 150 € para as que acrediten, ademais, ser familia numerosa”.

Poderán ser beneficiarios as familias en que convivan fillos menores de 18 anos, e nas cales, a suma dos ingresos totais da unidade de convivencia durante o ano 2013 non superen 1.5 veces o IPREM.

Os requisitos que deben cumprir son os seguintes: ser residente na Comunidade Autónoma de Galicia, ter fillos menores a cargo, estar aboando a correspondente factura de enerxía eléctrica a unha comercializadora e figurar como pagador na correspondente factura, non superar os límites de renda establecidos e non estar incurso nas prohibicións para obter a condición de beneficiario, recollidas no artigo 10 da Lei 9/2007, do 13 de xuño, de subvencións.

A documentación que terán que presentar é a seguinte: presentación electrónica da solicitude; no caso de non autorizar a consulta dos datos por parte da Xunta de Galicia, copia dixitalizada do D.N.I en vigor da persoa solicitante e do resto das persoas integrantes da unidade de convivencia; no caso de non autorizar a consultar os datos de carácter tributario, Declaración do IRPF relativa ao ano 2013; autorización aos funcionarios correspondentes para a presentación electrónica da solicitude e da documentación relativa á mesma (Anexo IV); copia dixitalizada do libro de familia; certificado de convivencia; facturas do segundo semestre de 2014 en concepto de subministración eléctrica e xustificantes de pagamento; e copia do título de familia numerosa.

As persoas interesadas en obter máis información deben dirixirse aos Servizos Sociais Municipais, sitos na Casa do Concello en horario de 8 a 14 horas, de luns a venres.