Llano asegura que tentou buscar unha solución para as coidadoras do comedor do CEIP Vista Alegre, pero non obtivo resposta algunha por parte da Xunta

Burela, 17 de setembro de 2015.- O alcalde, Alfredo Llano, asegura que tentou que as coidadoras do comedor do CEIP Vista Alegre foran subrogadas pola empresa que agora prestará ese servizo, pero que nunca obtivo ningún tipo de resposta por parte da Xunta ás súas peticións. Llano rexeita as acusacións realizadas nas últimas horas desde o grupo municipal do PP.

O rexedor subliñou que “no Concello de Burela dende que soubemos que había ese problema mantivemos moitas conversas coas propias traballadoras que estaban alí, no Vista Alegre; estivemos falando con elas e cos seus representantes sindicais e a intención nosa foi sempre que estas traballadoras tivesen a oportunidade de continuar traballando alí, aínda que non fora con contrato do Concello porque loxicamente nosoutros xa non pitamos nada alí dado que a Xunta de Galicia xa se fixo cargo do comedor do Vista Alegre a través dunha empresa de cátering”.

Llano explicou que “a miña intención foi sempre buscar unha solución axeitada e sobre todo procurando atender as demandas das traballadoras e intentei a través da Xunta de Galicia por todos os medios para que me puxeran en contacto coa empresa, para buscar unha solución conxunta. Pero a Xunta de Galicia, a pesar de que lle mandamos un documento onde solicitábamos todo tipo de información, non nos contestou absolutamente nada nin nos dixo cal ía ser a empresa nin que tipo de contratos pretendían facer. A información que solicitamos non nos foi enviada nunca e iso que xa o pedimos con bastante antelación”.

O alcalde burelés dixo: “que se pretenda agora dicir que nosoutros non nos movemos ou que tratamos de facer barullo con isto non é certo. En primeiro lugar, que non veña dicindo o PP que non estivemos falando coa xente nin que trate de desvirtuar o labor que fixen eu, dicindo que fixen conversas esperando no ascensor, cando non é certo. Foi todo nos despachos e cunha determinación clara e contundente: eu preguntaba cousas que tiñan que contestarme, pero nunca houbo unha axuda concreta e eficaz nese aspecto. Non tivemos nada de información, porque toda a que se solicitou non a conseguimos ata que a dirección do centro nola mandou, porque lla pedín eu persoalmente para ter algún documento que realmente xustificara que xa non tiñan que ir as nosas traballadoras alí. A dirección do Vista Alegre mandounos un documento onde figuraba o nome da empresa e que contaba co seu propio persoal para levar adiante o servizo. Enviáronnola en vésperas de empezar a funcionar o comedor no Vista Alegre. Ese labor tiña que telo feito a Xunta hai moito tempo para que dalgunha maneira procuráramos buscar unha solución, como puidera ser a subrogación destas traballadoras que estaban no Vista Alegre. Podía facerse dado que xa non podían seguir porque desaparece ese servizo municipal nese centro de ensino. Pero non foi posible porque non houbo ningún contacto dado que a Xunta non foi responsable nin sequera amable á hora de atender a nosa petición, que se fixo con moito tempo para poder facer algo en firme”.

Alfredo Llano insistiu: “a nosa intencionalidade sempre foi buscar unha solución para as traballadoras, coas que tivemos múltiples reunións. Non lles prometemos nada raro, eu xa lles dixen na primeira reunión que íamos procurar buscar unha solución dentro da legalidade e da obxectividade. Sempre lles dixen que íamos procurar axudarlles, pero sen prometerlles nada; nin tampouco lles dixen que ían seguir traballando na gardería infantil nin noutro servizo, porque é imposible. Nosoutros non vamos facer cousas raras, como posiblemente puideran facer outros. Nosoutros facemos todo obxectivamente e sempre cumprindo a lei estritamente. Así que en base a iso foi como actuamos, pero tamén había unha intencionalidade clara, contundente e rotunda de axudar a solucionar o problema que lles viña enriba ás traballadoras que estaban antes no Vista Alegre”.