Fernando Suárez reitera e subliña que con axuda da Xunta ou sen ela a residencia de maiores de Ribadeo será unha realidade

Ribadeo, 29 de outubro de 2015.- O alcalde, Fernando Suárez, reitera e subliña que con axuda da Xunta ou sen ela a residencia de maiores será unha realidade. O rexedor acusa ao PP de facer política partidaria da mala con este asunto e asegura que os técnicos xurídicos do Concello din que o que a Xunta lles solicita é irregular e anormal e que non se precisa para conceder unha axuda de 500.000 euros. Así sae ao paso das críticas vertidas esta mañá en Ribadeo por representantes do PP.

O rexedor dixo: “a ese documento que asinamos case todos: os representantes da corporación do Bloque, do PSOE, de Ciudadanos e os das asociacións de veciños, que nos diriximos ao conselleiro de Política Social para que dixera se apoiaba ou non, dunha vez por todas, o tema da residencia, agora vemos que quen nos contesta non é o conselleiro nin é ningún responsable institucional da Xunta de Galicia, senón que quen contesta é un representante político, do PP, nun local político, do PP de Ribadeo. E, desde logo, non por esperada esta contestación deixa de sorprendernos”.

Para Fernando Suárez os populares “acoden á mesma letanía de sempre, que o alcalde non presenta os documentos, e quen o di é precisamente un indocumentado que non ten nin a máis remota idea do que está dicindo, que non é consciente de que os técnicos xurídicos do Concello de Ribadeo non están postos nin polo Bloque nin por ningún outro partido. Son técnicos que se deben á súa profesión e din que o que nos está pedindo a Xunta é absolutamente anormal e irregular e non entra dentro do procedemento para o outorgamento desta axuda. É dicir, que o que lle vale á Deputación para darnos practicamente 2 millóns de euros non lle vale á Xunta para darnos eses pírricos 500.000 euros, que de todas maneiras son importantes porque se a Xunta non os pon témolos que acabar poñendo desde o Concello de Ribadeo, cando non temos a competencia en servizos sociais”. O alcalde sinalou que “en Ribadeo queremos todos, non soamente o alcalde senón tamén o resto de grupos, que ata agora eran todos, porque hai que lembrar que no mandato anterior o PP local, a través dos seus representantes institucionais no Concello, tamén estaba de acordo con todo o que se propoñía entre todos, pero lamentablemente agora, nesta nova etapa, estes representantes institucionais do PP de Ribadeo no Concello falan máis do que escoitan; é dicir, falan moito e escoitan pouco”.

Suárez Barcia considera que “aquí o que queda claro a ollos de toda a cidadanía é que o PP está a facer política partidaria da mala, da cocha, da que a xente abomina, e quen estamos, salvando as diferenzas e as discrepancias, como o Bloque, o PSOE, Ciudadanos e os representantes das asociacións de veciños, traballando a unha para buscar o mellor para que a residencia se constrúa e funcione. E, desde logo, non me amolan a min, como alcalde, nin ao PSOE nin a Ciudadanos nin aos cargos institucionais do PP no pasado mandato; estanlle facendo unha afronta a toda a veciñanza deste concello, aos veciños e veciñas que ven e que reproban esta política ruín que están facendo con nós”.

O alcalde de Ribadeo reitera e subliña que “en todo caso mellor coa Xunta, pero se é sen ela, aínda que teñamos que sacalo de fondos propios e de onde faga falla, a residencia vaise acabar, vaise poñer a andar, mal que lles pese, e será para os veciños e veciñas de Ribadeo, con concurso deles ou sen el, pero a residencia será unha realidade”.