Villares destaca a boa calidade da auga para os veciños de Cervo e Burela e a garantía de subministro que supón contar con captación de dous encoros

Cervo, 23 de outubro de 2015.- O alcalde de Cervo, Alfonso Villares, deu conta este venres da primeira reunión da nova etapa do Consorcio de Auga Burela-Cervo e destacou a mellora da calidade da auga “nun cen por cen” e o bo funcionamento das instalacións dende hai catro anos. O rexedor non ve necesario o dragado do embalse de Rúa porque o bombeo dende o de Riocobo xa garante o subministro para os dous municipios.

“Tivemos onte unha reunión do Consorcio da Auga Cervo-Burela, que xa leva catro anos de funcionamento, pero agora incorporáronse novas persoas ao Consorcio: tanto os representantes de Burela, Alfredo Llano e unha concelleira, como por parte de Cervo, onde imos estar a concelleira de Medio Ambiente, Manuela Méndez, e eu mesmo. Nesta primeira reunión desta nova tempada aproveitamos para recordar cuestións que eu creo que é importante poñer en valor. Primeiramente, que o Consorcio de Auga de Burela-Cervo e as instalacións están a funcionar moi ben e dende que están en marcha podemos dicir que o nivel da calidade da auga mellorou case nun cen por cen, porque a maior parte dos procesos que agora se fan son novidosos e non se realizaban antes, cando non existía este Consorcio nin as estas infraestruturas, que foron financiadas pola Xunta de Galicia”, destacou o rexedor cervense.

Villares engadiu que “aínda que, sen dúbida ningunha, hai cousas que hai que ir mellorando creo que hai que poñer en valor o que temos: unhas instalacións que nos reportan unha calidade de auga como nunca a tivemos en Cervo e Burela, evidentemente con momentos puntuais nos que esa calidade pode non ser tan boa por motivo das choivas ou calquera outro, pero en momentos moi excepcionais”.

Tamén se tratou na reunión a situación do embalse de Rúa e o seu posible dragado, sobre o que o alcalde de Cervo manifestou: “eu comentei moitas veces dentro do foro do Consorcio que é unha proposta que agora mesmo nin é interesante nin vemos que teña ningún tipo de aspecto positivo nin para o almacenamento da auga nin da calidade da mesma. O bo que ten o funcionamento do Consorcio é que ao poder ter unhas bombas enchufadas no embalse de Riocobo iso garante que sempre haxa auga nos dous municipios, mesmo nas épocas máis estivais. A súa capacidade é case 600 veces superior á do embalse de Rúa e é o que nos garante que os veciños das dúas poboacións teñamos sempre auga. Ademais o custe que ten o bombeo dende Riocobo é entorno a uns 13.000 euros, que se paga case exclusivamente pola potencia da luz, non polo consumo. Ademais ese bombeo sérvenos para momentos puntuais, cando está moi turbio o encoro de Rúa para nese caso tirar do embalse de Riocobo, con augas máis limpas. Son 13.000 euros, que van moi por debaixo do que nos custaría dragar o embalse de Rúa. Ademais habería que tratar os lodos e durante todo ese tempo estaría o encoro inutilizado, para despois conseguir apenas nada, moi pouco volume máis de captación de auga, porque o que nos garante o volume de auga é sempre o embalse de Riocobo. Son aspectos que onte puxemos encima da mesa, aspectos importantes, para recordarlles ás novas persoas que se incorporan e darlles a idea aos veciños tanto de Cervo coma de Burela de que a calidade de auga que temos agora mesmo non ten nada que ver coa que tiñamos hai catro anos senón que mellorou nun cen por cen”.