A situación económica do Concello mellorou moito dende 1999, pasando de ter seis préstamos bancarios a só dous

Cervo, 19 de novembro de 2015.- A situación económica do Concello de Cervo mellorou moito dende 1999 pois pasou de ter seis préstamos bancarios nese ano a só dous na actualidade.

A concelleira de Facenda, Dolores García Caramés, explicou este xoves que “datos fieis de que a situación da débeda bancaria mellorou nestes anos son que no 1999 o Concello contaba con 6 préstamos, cun total de débeda de 3.747.931,20 euros; tres de eles cun euribor do 0,35, outro cun 0,40 e os outros dous cun 0,45. Esa era a realidade que había en 1999, que viña do goberno municipal socialista dos anos anteriores; un exemplo é que do 1996 ao 1999 o Concello tivo que pagar 714.628,66 euros de intereses por eses seis préstamos”.

Dolores García engadiu que “en cambio a situación económica actual é moi distinta, despois de que os gobernos municipais do PP se marcaran como obxectivo durante os últimos anos baixar esa débeda contraída, este ano a cantidade de débeda é de 1.736.208,83 euros. Actualmente o noso Concello conta con dous préstamos, un cun euribor do 0,18, e de outro hai que destacar que non se pagan intereses e que nos últimos catro anos o Concello abonou de intereses 222.498, 86 euros, que é unha cifra moito menor que a da etapa de 1996 a 1999”.

A edil de Facenda rematou comentando que “a débeda baixou considerablemente e o máis importante é que non supón unha carga tan grande para as arcas municipais e desta forma o Concello pode contar con máis diñeiro para investir e responder ás necesidades do municipio”.