Jesús López Penabad interésase pola residencia da terceira idade co conselleiro de Política Social

Ribadeo, 13 de novembro de 2015.- O presidente do PP en Ribadeo e voceiro do Grupo Municipal do PP na localidade, Jesús López Penabad, interesouse este venres co conselleiro de Política Social, José Manuel Rey Varela, pola residencia da terceira idade, aproveitando a visita do responsable do departamento da Xunta de Galicia á comarca.

López Penabad explica que o conselleiro confirmoulle a vontade da Xunta de achegar os 500.000 euros para o financiamento do proxecto, unha contía que non pode xustificar mentres o alcalde de Ribadeo, o nacionalista, Fernando Suárez, non remita os informes pendentes, polos que levan 15 meses agardando. O presidente dos populares di que Rey Varela explicoulle que, mentres isto non se produza, ten as mans atadas.

Así as cousas, o voceiro do PP na localidade trasladoulle ao conselleiro a necesidade de buscar unha solución para a achega dese diñeiro. López Penabad conclúe que tanto o Partido Popular de Ribadeo como a Xunta de Galicia teñen un compromiso claro con este proxecto e lamenta que o alcalde da localidade non estea a cumprir coa normativa correspondente, bloqueando a colaboración da administración autonómica.