O BNG chama a participar nunha caravana de coches dende o dique norte de Morás ata a Cruz do Lobo “para demandar o desbloqueo do investimento en infraestruturas na comarca”

A Mariña, 11 de novembro de 2015. Non é unha falacia dicir que cruzar a comarca da Mariña desde Ribadeo a Viveiro leva na mellor da circunstancias máis dunha hora, o mesmo que ir a Lugo sendo a distancia moito menor. Intentar moverse en ferrocarril é tarefa imposíbel pola ausencia de horarios axeitados e resulta practicamente imposíbel encaixar horarios laborais cos horarios do transporte público existente a calquera punto da comarca xa sexa interior ou costeiro. A ausencia de infraestruturas dignas para conectar entre si os concellos da comarca e co exterior, supón un atranco ao desenvolvemento da comarca que aínda así, e a pesar da crise económica, mantén o estatus de motor económico da provincia co 30% do PIB provincial con sectores económicos tan importantes como o pesqueiro, o agro-gandeiro, o forestal, o comercio e turismo ou a fabricación de aluminio pola multinacional ALCOA.

CARAVANA DE COCHES DESDE O DIQUE NORTE DE MORÁS ATE A CRUZ DO LOBO PARA RECLAMAR FUTURO PARA A MARIÑA
A portavoz comarcal do BNG, Ana Ermida Igrexas, chamou á sociedade mariñá máis activa a participar nunha nova reivindicación cunha caravana de coches que sairá o próximo sábado 14 ás 10:30 do dique norte de Morás para demandar solucións sobre a situación das estradas de competencia estatal N642 e N634, solución definitiva aos peches continuados na A8 e ampliación do estudo construtivo a todo o recorrido da autovía de conexión entre Barreiros e San Cibrao.

A formación nacionalista tamén chama a atención sobre os atrasos no remate da VAP da costa entre San Cibrao e Ferrol, coa variante de Viveiro sen solución definitiva e cun tramo en obras entre San Cibrao e Celeiro que non terá continuación nin a oriente nin a occidente, polo que os compromisos do anterior conselleiro de infraestruturas para ter rematada toda a obra en 2017 son papel mollado.

Igualmente, a formación nacionalista sinala “o engano ao que todos os anos somete o goberno do Estado ás veciñas e veciños da comarca con promesas e consignacións orzamentarias que nunca chegan a executarse, coma os 800.000 euros que se prevían investir na estrada da costa no 2015 e polos que aínda estamos agardando”.

O BNG non esquece outras demandas históricas na comarca como é a liberación para usos comerciais do dique norte de Morás, rematar co saqueo dos recursos procedentes de ingresos por tráfico portuario no peirao de San Cibrao para que estes revertan na comarca e demandar a transferencia a Portos de Galiza dos portos galegos de competencia estatal.

ENCONTRO CO TECIDO SOCIOECONÓMICO DA COMARCA
A portavoz comarcal nacionalista explicou que “estamos falando de reivindicacións históricas na comarca, algunha delas con compromisos incumpridos reiteradamente que coartan as posibilidades de desenvolvemento dunha comarca puxante en termos económicos a pesar das eivas de comunicación existentes.” Neste sentido, para dar continuidade a un encontro celebrado en decembro de 2014 co tecido socioeconómico da comarca no que quedaron claras as coincidencias nas demandas sobre a necesidade de rematar as infraestruturas pendentes, organízase un novo encontro ás 13:00 no Restaurante O Asador de Barreiros, ao que foron convidados os principais axentes económicos e sociais da comarca e aberto a quen teña interese en coñecer de primeira man as propostas nacionalistas e intercambiar opinións de cara a trasladar as revindicacións a onde sexa preciso.