O BNG de Foz pide explicacións ao alcalde sobre o informe que cuestiona a legalidade dos pagos do Concello

Foz, 18 de novembro de 2015.- O Servizo de Intervención do Concello de Foz, nun informe con número de expediente 917/2015 cuestiona a legalidade dos pagos aprobados polo Grupo de Goberno Local en beneficio da empresa mercantil IBEROELECTRA 3000 SL e que ascenden unha contía de 29.004,14 euros.

O informe de Intervención afirma que “as facturas superan con creces o importe de 18.000,00 € non seguíndose ningún procedemento de adxudicación” e continúa indicando que “existen pendentes de pago e sen devolver facturas de FENOSA, e ademais existen nestes momentos facturando ao Concello polo mesmo concepto como mínimo dúas empresas, Iberolectra e Fenosa”. Na mesma liña desde Intervención destácase que se está a proceder ao “fraccionamento de facturas”, e por conseguinte incumprindo o disposto no Texto Refundido da Lei de Contratos do Sector Público.

O Bloque Nacionalista Galego considera que o grupo de goberno está a trocear os contratos, a fin de diminuír a contía dos mesmos, eludindo así os requisitos de publicidade e os relativos ao procedemento de adxudicación que se establecen no artigo 86.2 do Texto Refundido da Lei de Contratos. “Non é só que o grupo de goberno se poida estar situando fóra da lei, como recolle o Informe de Intervención, senón que o grupo de goberno está xerando un serio prexuízo ao interese xeral ao non dar posibilidade a contratar a outras empresas. As nacionalistas non imos dar por bo ningún contrato que se adxudique pola vía do dedo e aquí estamos diante dun caso evidente de dedazo”, afirman Teresa Rego e Lorena Seivane.

“A equipa de goberno debe explicarnos por que motivos adxudica este servizo a unha empresa e non a outra, cal é a razón pola que por este mesmo servizo hai dúas empresas que están facturando ao Concello cando isto leva necesariamente a aumentar os gastos de luz do Concello, como explica que non teña sacado o servizo de subministro a concurso no seu conxunto polo aforro e se ten pensado sacalo e tamén por que motivo o grupo de Goberno procedeu a aprobar estes pagos coñecendo a advertencia de ilegalidade que se tiña formulado polo organismo fiscalizador competente, isto é por intervención” preguntan desde a organización nacionalista que instan a que o Alcalde dea a cara neste tema.

O Bloque Nacionalista Galego solicita tamén que desde a Alcaldía se aclare un suposto referido neste informe que indica que o programa contable do Concello para o exercicio 2015 non está adaptado. “O programa contable do Concello para o exercicio 2015, consecuencia do cambio existente na contabilidade municipal, non está adaptado e non permite realizar os novos asentos relacionados co grupo 8 e 9 do Plan, do mesmo xeito atópanse moitas deficiencias en relación a nova contabilización”. O BNG quere saber por que razóns se chegou a esta situación, xa que non parece normal que unha situación así se alongue cando menos durante seis meses e se o problema que indica Intervención se ten solucionado a data de hoxe.