A Xunta intentará que todos os representantes da frota do cerco acorden o reparto de cota que mellor se axuste ao seu modelo de pesca

Santiago, 22 de decembro de 2015.- A conselleira do Mar, Rosa Quintana, explicou esta tarde no pleno do Parlamento que a Xunta fará todo o posible para que os representantes da frota do cerco acorden o reparto de cota que mellor se axuste ao seu modelo de pesca. Para iso, subliñou a titular de Mar, hai que ter moi claro “cara a onde queremos ir e cales son as consecuencias”, xa que “cando en xestión pesqueira se propón un cambio, hai que ter feito ben os cálculos para non obter uns resultados que, lonxe de solucionar un problema, contribúa a agravalo”.

Neste sentido referiuse ao modelo de reparto por número de tripulantes que solicita parte do sector e advertiu que, de adoptalo, “Galicia non sairía tan ben parada como algúns están a transmitir á opinión pública”, xa que “perderíamos máis da metade de xurelo na zona IXa (a que vai de Fisterra cara ao sur), pois teríamos que repartir a cota con Andalucía e as comunidades do Cantábrico”.

Así, explicou, “pasaríamos de ter o 98% da cota a ter o 34% na zona onde máis pescamos nos anos pasados e onde acumulamos dous terzos da cota total de xurelo que ten Galicia”. A isto habería que sumar, engadiu, “que hai barcos na nosa frota que non terían porte para pescar en zonas máis afastadas coma a VIIIb (golfo de Biscaia)”.

Ademais lembrou que de realizar o reparto por número de tripulantes, “Galicia perdería case cun 20% das nosas posibilidades de pesca do cerco galego no seu conxunto e cremos que un Goberno galego serio e responsable non pode prexudicar a Galicia”, sentenciou.

Xestión da cota
A conselleira lembrou ao sector que xestiona a cota de maneira conxunta que ten o deber de facelo dun xeito ordenado e planificado para evitar desequilibrios entre os seus propios barcos. Neste sentido, puxo como exemplo positivo á confraría de Cambados, que xestionou en conxunto a cota de nove dos seus barcos e logrou que, a 10 de decembro, se consumise o 99,71% da cota de xurelo da zona IXa, evitando sobrepasamentos e mantendo a actividade da frota. Unhas circunstancias que se afastan doutras agrupacións de cerqueiros que optaron pola xestión conxunta.