AGEe consulta á Comisión Europea se está disposta a valorar o reparto de cota por tripulante

Estrasburgo, 17 de decembro de 2015.- A eurodeputada de Alternativa Galega de Esquerda en Europa (AGEe), Lídia Senra, vén de rexistrar outra pregunta parlamentaria escrita dirixida á Comisión Europea co fin de obter unha resposta concreta ao respeito da posibilidade de que se estableza un reparto de cota para o sector do cerco baseado no número de tripulantes por barco e día.

O texto fai fincapé na interpretación do Artigo 17 da Política Pesqueira Común (PPC), que obriga xuridicamente aos Estados membros a incluír criterios sociais, económicos e medioambientais, o que permite que a distribución de cota non se realice so en base ao rexistro de históricos, un procedemento que beneficia a quen máis, ou mesmo demasiado, tivera pescado nas campañas do período 2002-2012.

Porén, sinala AGEe na súa pregunta, en clara contradicción cos criterios especificados no Art.17, na Galiza atopamos que a Asociación de Armadores do Cerco de Galiza (ACERGA), que representa ao 80% da frota de pesca sta arte, só dispón do 20% da cota debido à distribución realizada polo Estado espanhol, o que está a deixar a máis de 1.200 famílias nunha situación económica limite.

Aliás, o texto da pregunta salienta a inxustiza do feito de que precisamente o sector do cerco na Galiza tomou a decisión de, en base a criterios de medioambientais e de sustentabilidade, autorregular as súas propias capturas mesmo dende antes o 2002 -concretamente dende o ano 1980-, unha actitude responsábel e acorde cos valores de conservación recollidos na PPC, mais que, en lugar de ser valorada, agora estalles a repercutir negativamente debido a preferencia do criterio de reparto en base a históricos aplicado polo Estado espanhol.

Este criterio de reparto por históricos é ademais especialmente discriminatorio con aquela xente novas que desexe incorporarse á actividade. En relación a esta circunstancia concreta, de grande importancia para o mantemento do futuro do sector, Alternativa Galega de Esquerda en Europa consulta tamén á Comisión na súa pregunta se estaría disposta a crear unha reserva de cota para garantir a viabilidade daquelas persoas que se incorporan à actividade pesqueira.

A eurodeputada de AGEe empregou tamén o pasado luns a quenda de intervención libre dun minuto de duración na sesión plenaria do Parlamento Europeo en Estrasburgo para expor as reivindicacións principais do sector do cerco.

Lídia Senra tamén estivo acompañando en Bruxelas a unha delegación de ACERGA o pasado 10 de novembro na súa entrevista con Alain Cadec, presidente da Comisión de Pesca do Parlamento Europeo, a quen trasladaron directamente as súas reivindicacións. AGE ten amosado o seu apoio á acampada reivindicativa que o sector mantén en Santiago de Compostela dende o pasado 22 de outubro e, mais recentemente, Senra, o deputado de AGE Juan Fajardo e as candidatas número 1 e 2 de En Marea pola provincia de Pontevedra, Alexandra Fernández e Ángela Rodríguez, trasladaron o respaldo de Alternativa Galega de Esquerda á proposta de reparto de cotas vinculado ao número de tripulantes defendida polo sector.