Ribadeo, 14 de setembro de 2026. Ribadeo realizará diversas melloras en Folgosa, tanto no acceso principal como no propio barrio. O investimento ascende a 50.000 euros.
O alcalde, Dani Vega, indicou que “seguimos xestionando orzamento e neste caso actuamos en Folgosa, no acceso principal, dado que estaba moi deteriorado quixemos renovalo e non soamente naquelo que se ve, senón naquelo que non se ve, actuando no importante na recollida de augas, no saneamento, tamén na mellora e na nova colocación de luminarias porque estaba sen iluminación o acceso e tamén o pavimentado”.
O rexedor contou que “temos que actuar tamén no barrio de Folgosa, dado que se acumula bastante auga diante das portas das casas. Vamos renovar toda esa zona e tamén vamos actuar dende a rotonda do Vilar ao polígono industrial e dende o polígono industrial á estrada que nos leva á Escola de Piñeira”.
Vega subliñou: “estamos diante dunha actuación de renovación de pavimento e tamén de mellora do saneamento, abastecemento e iluminación, que fai un plan importante cunha inversión de máis de 50.000 euros para esta infraestrutura”.
As peticións dos veciños e veciñas de Folgosa son atendidas polo Concello: “quixemos escoltar aos veciños, demandaban a mellora do pavimento da pista onde realizan os eventos e as súas festas, dado que tamén está moi destrozado. Vamos canalizar o frontal da parcela e vamos aglomerar o fronte da pista, que está destrozado. Seguimos xestionando orzamento da Xunta de Galicia, actuando naqueles puntos onde está moi destrozado o pavimento e baixo esa planificación de inversión, desgraciadamente non pode ser todo tan rápido como queremos, pero dentro do plan estratéxico, o plan Avanza Rural, vamos actuando en todas as parroquias, en todos os núcleos de poboación, pasiño a pasiño e tendo en conta as peticións que nos fan chegar as asociacións veciñais”, engadiu o alcalde ribadense.
A conselleira do Medio Rural, María José Gómez, acompañada pola directora xeral de Relacións Institucionais e Parlamentarias, Sandra Vázquez, e a directora xeral de Urbanismo, Encarnación Rivas, asistiu á ofrenda da Virxe dos Remedios en Mondoñedo.
Era o único ocupante do turismo e os Bombeiros de Vilalba tiveron que excarceralo. Ao fío das 13:30 horas, un particular informou ao 112 Galicia dun coche que se saíra da vía e acabara batendo contra unha árbore no quilómetro 75 da N-640, en Ludrio (Castro de Rei). O propio alertador sinalou que o accidente semellaba grave polo estado no que quedara o vehículo. Cando chegaron ao lugar, os servizos de emerxencias confirmaron que só había unha persoa implicada,un home que resultou falecido e foi excarcerado polos bombeiros. No operativo participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada.
O director xeral agradeceu aos membros e traballadores da entidade todo o seu labor na defensa dos dereitos dos máis novos. Deste xeito, puxo en valor a súa traxectoria e o compromiso cun modelo integrador e inclusivo no que os menores do sistema de protección vivan nunha contorna totalmente familiar. Neste sentido, Jacobo Rey fixo fincapé na importancia da colaboración entre a Xunta e o tecido social para seguir fortalecendo un sistema que garanta o benestar dos nenos e adolescentes, con centros como San Aníbal que conforman un auténtico fogar.
A alcaldesa Marta Rouco inaugurou a cita, que abriu coa IV Volta Ciclista á Terra Chá e cunha programación centrada na relación entre Galicia e Cuba e na memoria da emigración. Houbo unha mesa redonda sobre o Centro Galego da Habana, a exposición Galicia Imaxinada e música, ademais dunha mostra de xornais antigos. Rouco reivindicou a importancia de lembrar a emigración galega e apelou a mirar con humanidade as migracións actuais, destacando tamén o papel das asociacións culturais das parroquias na conservación das tradicións. A feira continou con desfile de época, xantar popular, xogos, animación, baile cubano, foliada, queimada e propostas musicais e artesanais ata a noite.
Na IV Festa dos Ovos Rotos con Chourizo e Feira de Artesanía, María José Gómez puxo en valor a importancia económica e social deste produto e o papel da artesanía alimentaria, con sete operadores presentes. Subliñou que o evento consolídase como unha cita que promove a gastronomía galega e recupera oficios tradicionais, dinamizando a vida económica e social de Castro de Rei.
Ocorreu minutos antes das 11:30 horas. Unha persoa foi trasladada ao hospital tras resultar ferida na colisión entre un coche e un autobús no quilómetro 512 da A-8 en sentido A Coruña, en Vilaframil (Ribadeo). Entre os alertadores estiveron as persoas que viaxaban no coche, que puideran saír do vehículo. Por outra banda, o autobús conseguiu deterse uns metros máis adiante. Ao punto desprazáronse Urxencias Sanitarias de Galicia-061, a Garda Civil de Tráfico e os servizos de mantemento da autovía.
O próximo luns 14 de setembro comeza un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
