O Burela FS Pescados Rubén regresou á pugna ligueira con contundencia na Tarde Laranxa, recuperando a senda da vitoria (5-1), ante un mozo Gironella que saltou a Vista Alegre con valentía e ambición, intentando ralentizar o xogo das mariñás cunha presión alta.
O conxunto de Lucas non perdoou na súa primeira chegada clara á zona de perigo visitante; desde a banda, Bea Mateos cedeu o gol a Peque, ao bordo da liña de meta. Ceci, ao pau no 3, e Bea Mateos, no 4, freada desde o chan por Saray. Andrea non tatexou nun par de chegadas con perigo das catalás e de novo a implacable Peque volveu ver portería, en parede con Gaby, tras desmarque da brasileira (minuto 14). O Gironella puido frear a calidade laranxa cunha presión alta en busca de ocos na defensa local. Berta Velasco reduciu distancias a falta de dous minutos para o descanso asistida por unha talentosa Stela en contraataque. A bucina marcou a chegada do descanso cunha oportunidade de ouro para Ceci ao bordo da liña de meta, asistida por Gaby.
Regresou a contenda sobre a pista con máis fame de máis gol. Laura evitou a tentativa de Peque pero a 7 burelista volveu buscar a meta defendida por Noelia no segundo período; tras superar a defensa catalá, outorgou o gol desde a banda para Lara (minuto 24). Stela, unha das xogadoras máis dinámicas do Gironella, intentou sorprender a Jozi cunha vaselina, sen éxito. Rozando o ecuador do último tramo, Gaby, pegada ao pau, asinou o definitivo 5-1, desde saque de esquina de Peque que recolleu de volea Maite.
Semana de podio
As burelistas volverán á liga este martes, día 8, con duelo irmandiño moi rifado na pista do Ourense Envialia (17.00 horas). Tan só catro días despois, o líder madrileño recalará en Vista Alegre (sábado 12, 18.30 horas).
Ficha técnica
CD Burela FS Pescados Rubén: Andrea, Peque, Ceci, Bea Mateos, Maite, cinco inicial; tamén xogaron Gaby, Lara, Judith, Jozi
FS Gironella: Saray, Stela, Celia, Helena, Julia, cinco inicial; tamén xogaron Berta Velasco, Laura, Cristina, Zoe, Iris, Noelia
Goles: 1-0, minuto 2, Peque; 2-0, minuto 14, Peque; 3-0, minuto 15, Maite; 3-1, minuto 18, Berta Velasco; 4-1, minuto 24, Lara; 5-1, minuto 29, Gaby;
Árbitros: Muñoz García // Fandiño Rodríguez (Asturias). Por Gironella amarela para Celia (minuto 30)
Incidencias: Partido correspondente á novena xornada de Primeira División RFEF, disputado en Vista Alegre. Arredor de 500 espectadores.
Era o único ocupante do turismo e os Bombeiros de Vilalba tiveron que excarceralo. Ao fío das 13:30 horas, un particular informou ao 112 Galicia dun coche que se saíra da vía e acabara batendo contra unha árbore no quilómetro 75 da N-640, en Ludrio (Castro de Rei). O propio alertador sinalou que o accidente semellaba grave polo estado no que quedara o vehículo. Cando chegaron ao lugar, os servizos de emerxencias confirmaron que só había unha persoa implicada,un home que resultou falecido e foi excarcerado polos bombeiros. No operativo participaron Urxencias Sanitarias de Galicia-061, a Garda Civil de Tráfico, os Bombeiros de Vilalba e os servizos de mantemento da estrada.
O director xeral agradeceu aos membros e traballadores da entidade todo o seu labor na defensa dos dereitos dos máis novos. Deste xeito, puxo en valor a súa traxectoria e o compromiso cun modelo integrador e inclusivo no que os menores do sistema de protección vivan nunha contorna totalmente familiar. Neste sentido, Jacobo Rey fixo fincapé na importancia da colaboración entre a Xunta e o tecido social para seguir fortalecendo un sistema que garanta o benestar dos nenos e adolescentes, con centros como San Aníbal que conforman un auténtico fogar.
A alcaldesa Marta Rouco inaugurou a cita, que abriu coa IV Volta Ciclista á Terra Chá e cunha programación centrada na relación entre Galicia e Cuba e na memoria da emigración. Houbo unha mesa redonda sobre o Centro Galego da Habana, a exposición Galicia Imaxinada e música, ademais dunha mostra de xornais antigos. Rouco reivindicou a importancia de lembrar a emigración galega e apelou a mirar con humanidade as migracións actuais, destacando tamén o papel das asociacións culturais das parroquias na conservación das tradicións. A feira continúa con desfile de época, xantar popular, xogos, animación, baile cubano, foliada, queimada e propostas musicais e artesanais ata a noite.
Na IV Festa dos Ovos Rotos con Chourizo e Feira de Artesanía, María José Gómez puxo en valor a importancia económica e social deste produto e o papel da artesanía alimentaria, con sete operadores presentes. Subliñou que o evento consolídase como unha cita que promove a gastronomía galega e recupera oficios tradicionais, dinamizando a vida económica e social de Castro de Rei.
Ocorreu minutos antes das 11:30 horas. Unha persoa foi trasladada ao hospital tras resultar ferida na colisión entre un coche e un autobús no quilómetro 512 da A-8 en sentido A Coruña, en Vilaframil (Ribadeo). Entre os alertadores estiveron as persoas que viaxaban no coche, que puideran saír do vehículo. Por outra banda, o autobús conseguiu deterse uns metros máis adiante. Ao punto desprazáronse Urxencias Sanitarias de Galicia-061, a Garda Civil de Tráfico e os servizos de mantemento da autovía.
O próximo luns 14 de setembro comeza un novo curso de español dirixido a persoas estranxeiras da man de Ecos do Sur, que se desenvolverá ata o 9 de outubro. A formación será dun total de 80 horas e as clases terán lugar de luns a venres, de 9:30 a 13:30 horas no Centro de Formación Ocupacional. O concelleiro de Inmigración, Mario Pillado, destacou o valor destas propostas para “facilitar ferramentas útiles ás persoas estranxeiras residentes no municipio e favorecer a súa integración, tanto social como administrativa”.
Finalizado o encontro, de carácter privado, o Cónsul asinou no Libro de Ouro da Deputación e a Presidenta fíxolle entrega dun agasallo institucional. Trala xuntanza Carmela López manifestou a súa satisfacción porque “traballamos para avanzar en novas vías de colaboración, e en posibles proxectos que serven para reforzar a relación entre a Deputación e o veciño país de Portugal”.
