O PSOE propón unha lei para garantir as prestacións ás persoas con discapacidade pois o PP suprimiullas ao 80% das mesmas

Lugo, 16 de decembro de 2015.- Este mércores pola mañá, a candidata socialista ao Congreso, Margarita Pérez Herráiz, e o candidato ao Senado, Ricardo Varela, xunto co deputado de Promoción Económica e Social, Álvaro Santos Ramos e a Concelleira de Servizos Sociais do Concello de Lugo, Ana González Abelleira, mantiveron un encontro con representantes de COGAMI na provincia. No encontro abordaron a situación na que se atopa o colectivo e trasladaron que o 80% dos mesmos quedaron sen ningún tipo de prestación debido aos recortes do goberno central do PP. Fronte a esta realidade os socialistas trasladáronlles que o PSOE recolle no seu Programa Electoral a creación dunha Lei de Servizos Sociais coa que garantir as prestacións a persoas en risco de exclusión, como son as persoas con discapacidade e os dependentes, entre outros.

Representantes de COGAMI amosaron a súa preocupación tras catro anos de Goberno popular no que se recortaron 2.000 millóns de euros ao Sistema de Atención á dependencia, o que repercutiu en que o 80% de persoas con discapacidade pero sen grao de dependencia quedasen sen ningunha das axudas que recibían a través destes fondos. Ademais, nestes catro anos aumentou en 400.000 o número de dependentes con dereito recoñecido a ela e que permanecen en lista de espera. Dende 2012, máis de 100.000 deses dependentes faleceron sen ter recibido a prestación á que tiñan dereito.

En España, aproximadamente, un 8% da poboación ten algunha discapacidade. “Trátase dun colectivo moi importante da cidadanía, con iguais dereitos, e que deben formar parte da sociedade en pé de igualdade e sen ter que sortear barreiras e dificultades. Dende os anos 80 deuse un grande paso: das políticas asistenciais ás políticas de integración e esa é a liña pola que o PSOE sempre apostou, non con palabras, senón con feitos”, sinalou a cabeza de lista provincial, Margarita Pérez Herráiz.

Sen embargo, o PP rompeu consensos que se mantiveron durante máis de tres décadas en materia de integración das persoas con discapacidade. Conduciu ao Estado do Benestar en xeral, e ao Sistema Público de Servizos Sociais en particular, a un evidente deterioro das súas estruturas e da súa capacidade de resposta das necesidades das persoas con discapacidade. Os recortes supoñen un sobrecuste para as persoas con discapacidade dun 40% en relación a outras persoas.

“Hai 9 anos o PSOE puxo en marcha unha Lei de dependencia pioneira e imprescindible. Unha lei que Rajoy boicoteou dende que chegou ao poder. Nós como socialistas temos o compromiso de recuperar e revitalizar esta lei cando cheguemos ao Goberno, porque é una decisión económica, pero sobre todo, porque forma parte dos nosos principios e dos nosos valores”, sinalou Margarita Pérez Herráiz.

Durante esta lexislatura de Goberno popular nada se avanzou nos dereitos das persoas en situación de discapacidade, nin se abordou a modificación de leis implicadas na aplicación efectiva da Convención Internacional dos dereitos das persoas con discapacidade (acordada polas Nacións Unidas). Máis ben ao contrario: as persoas con discapacidade, e especialmente os menores, sufriron con dureza os cambios na lei de dependencia, o incremento dos copagos, e os recortes en sanidade e apoio educativo. Tamén teñen que pagar o traslado a rehabilitación ou a consultas e o material ortopédico. Non se revalorizaron as súas pensións e a situación laboral é mala.

Un programa electoral con foco nos servizos sociais
Os candidatos socialistas pola provincia de Lugo presentaron algunas das medidas contempladas no Programa Electoral do PSOE para as eleccións do 20D. Algunhas das máis destacadas son:

-A reforma do artigo 49 da Constitución para sustituír o termo “diminuído” polo de “persoa con discapacidade”
-Deseñar una estratexia de Discapacidade no Medio Rural
-Aprobar un Plan de Acción de Mulleres con Discapacidade, que contemple as dificultades dese 60% de mulleres nos ámbitos laboráis, educativos, de acceso a servizos e contra a Violencia de Xénero
-Adaptar o Código Civil e a lei de Réxime Electoral para adaptase ao estipulado polo Convenio das Nacións Unidas en materia de dereitos das persoas con discapacidade
-Aprobar un Plan Nacional de Reactivación da Educación Inclusiva que contemple planes de atención educativa individualizados
-Incluír nos planes de estudo das enxeñarías, arquitecturas a materia de accesibilidade universal
-Promover a Estratexia de Inclusión Laboral 2015-2020 a favor das persoas con discapacidade e elaborar una normativa marco para a inclusión dentro do novo Estatuto dos traballadores, que regule de xeito innovador a realidade laboral deste colectivo
-Compatibilizar as pensións de invalidez na súa modalidade non contributiva co exercicio de actividades remuneradas ou non que a persoa sexa capaz de levar a cabo
-Excluír dos ingresos computables a efectos de carencia de rentas o importe de becas ou compensacións pola realización de prácticas profesionais
-Derogar o copago en dependencia así como o sistema de incompatibilidades e a revisión dos copagos farmacéuticos segundo grado de discapacidade