Son Viveiro demanda un acordo entre o Concello e as Comunidades de Montes

Viveiro, 14 de xaneiro de 2016.- O cinco de xaneiro, a prensa da comarca facíase eco dunha nova nestes termos: “La junta general de la Comunidad de Montes en Mano Común de Galdo, el pasado 27 de junio acordó por unanimidad donar a la parroquia la campana nueva, que costó 10.381,80 euros”.

O comunicado non tería maior interese de non ser que, no mes de agosto do pasado ano, o Grupo Municipal SON VIVEIRO tivese rexistrado unha iniciativa dirixida á Alcaldía de Viveiro interesándose pola escasísima colaboración que a directiva da Comunidade de Montes desa parroquia destina a obras, posto que a contía total dos investimentos en dito apartado fora de 266 € e de 393,25 € nos exercicios dos anos 2013 e 2014, respectivamente.

Desde o ano 1989 ao 2003, comunica a formación viveirense, estivo vixente un convenio polo que as Comunidades de Montes e o Concello achegaban ás obras de cada parroquia o 50% do custo das mesmas; nese convenio, estaban incluídos o arranxo e a limpeza de pistas, alumeado público, cemiterios, fontes, etc., sendo na actualidade o Concello e outras administracións quen afrontan en solitario a totalidade dos custos destas actuacións, ao tempo que estes colectivos desvían os seus orzamentos a actuacións de carácter privado, como é no caso que nos ocupa.

No seu programa electoral, o PSOE de Viveiro manifestaba, en relación a obras e infraestruturas: “Continuaremos cos acordos e convenios coas Asociacións de Montes, para a realización de obras de mellora para cada parroquia”.
A realidade é ben distinta: nin se mantiveron as reunións prometidas pola Sra. Alcaldesa, nin se está dedicando a atención que as distintas parroquias demandan.

Solicitan da Alcaldía o cumprimento do prometido, promovendo as xuntanzas anunciadas con estes colectivos na busca de convenios ou acordos que corrixan tamén o actual desfase, tanto por parte do goberno local como das comunidades de montes.

Xunto á igrexa onde foi instalada a campá citada, unha pista que conduce ao cemiterio parroquial está chea de fochancas e a escasos cen metros son tan frecuentes as roturas no entubado de abastecemento de auga que a pista xa non se asfalta. Tamén critican, desde SON VIVEIRO, a escasísima partida de 125.000 euros do presuposto municipal destinada a pavimentación, mantemento e conservación de vías públicas.

Non existe un plan plurianual para efectuar obras, en colaboración con outras administracións, que lle permitan o acceso á traída de auga e ao saneamento municipais á gran cantidade de veciñas e veciños que, en pleno século XXI, continúan carecendo de tan elementais servizos, co agravante de que a elaboración dos recentemente aprobados orzamentos municipais se produciu de costas ás distintas asociacións veciñais, das que as comunidades de montes son unha parte moi importante.

Denuncian tamén o desequilibrio entre as achegas dedicadas a festas e as partidas para obras de primeira necesidade, que posúen unha gran demanda nas zonas rurais e son imprescindibles para corrixir o desequilibrio existente con respecto ás urbanas e critican que a obra estrela do P.P., anunciada polo deputado nacional Jaime Olano, para o actual exercicio non sexa outra que a construción dun paseo marítimo desde Sacido á Ínsua, cuxa principal intención é a satisfacción de determinados intereses particulares antes que a abordaxe da urxente substitución da rede de saneamento municipal.

SON VIVEIRO propón a elaboración dun plan especial que, en varias fases, acometa a substitución dos 16.314,3 metros de entubado de fibrocemento existentes por ser este material, de prohibida comercialización desde o ano 2002, o que actualmente conduce a auga potable no noso Concello así como as ampliacións das conducións de abastecemento e saneamento.