Elena Candia recuperará a figura do coordinador de xefes de distrito para potenciar a participación dos militantes na Capital lucense

Lugo, 13 de febreiro de 2016.- A candidata á presidencia do Partido Popular de Lugo, Elena Candia, explicou que se acada a confianza no vindeiro Congreso provincial proporá á Xunta local lucense a recuperación da figura do coordinador de xefes de distrito para potenciar a participación dos militantes na capital.

Candia avoga por medidas prácticas que contribúan a incrementar os mecanismos de democracia interna e de colaboración dos militantes no día a día do partido e en cada proceso de toma de decisións, de tal xeito que en cidades como Lugo, con maior poboación, acadarán máis peso os distritos e, en consecuencia, as bases do partido.

O coordinador será o encargado de potenciar esta actividade e será tamén o responsable de articular un proceso para que o fluxo de información interna sexa cada vez maior. Tamén supervisará o funcionamento e posta en marcha dos foros necesarios para garantir maior sintonía entre os distintos cargos públicos (concelleiros, deputados, senadores) e os militantes.

ELECCIÓN DIRECTA DOS AFILIADOS
Candia explicou que, de cara ao futuro, cada vez que cese un responsable de distrito, esta figura se designará mediante elección directa dos afiliados do ámbito territorial correspondente e non, como ata o de agora, a proposta da dirección local. En función da avaliación que se faga do funcionamento deste modelo, non se descarta trasladalo a outras cidades lucenses.

“O maior patrimonio do Partido Popular son os seus militantes. Queren participar máis, ser escoitados. Queremos que todo eles contribúan máis activamente a facer partido, tanto no concello de Lugo como no conxunto da provincia”-indicou Candia.