O alcalde de Foz destaca a elevada participación nos actos de Entroido celebrados, especialmente no desfile do sábado, a pesar do mal tempo

Foz, 8 de febreiro de 2016.- O alcalde de Foz, Javier Jorge Castiñeira, destaca a elevada participación nos actos de Entroido celebrados este ano, especialmente no desfile do sábado, a pesar do mal tempo. E recorda que aínda quedan actividades, como o Baile do farolillo que haberá hoxe ás 23 horas, a festa infantil que se celebrará este martes ás cinco da tarde e a Queima do Entroido, coa que rematará o programa o venres.

O rexedor municipal mostrou este luns a súa satisfacción por cómo se está a desenrolar o programa de actos a pesares das condicións meteorolóxicas adversas: “desde o día do pregón, que estivo espléndido e hai que agradecer a participación de todos os grupos pero especialmente a das pregoeiras, a comparsa Sin Xeito. E sobre o desfile do sábado síntome tremendamente orgulloso dos meus veciños; de todas aquelas peñas que forman o Entroido de Foz; tamén da raíña e as damas, que tiñan a ilusión de saír e así o puidemos facer; da organización; e de todos aqueles que confiaron en que ía mellorar o tempo porque así o dicían as previsións. Estou moi contento, porque conseguir saír 800 persoas e que as rúas estiveran ateigadas de público nas condicións meteorolóxicas que había é o mellor de todos os éxitos. Destes últimos anos este é o máis satisfactorio de todo, sobre todo polas condicións meteorolóxicas. Estou moi orgulloso dos que non saíron e tamén dos que decidiron facelo, porque non é fácil tomar decisións nun momento tan complexo, pero creo que se tomaron as adecuadas para o normal funcionamento do Entroido de Foz, o que permite seguir cos actos tal e como estaban programados”.

Javier Castiñeira engadiu que está “moi contento tamén por como saíron o baile infantil e Touporroutou” e aproveitou para lembrar os actos que aínda quedan desta edición do Entroido focense: “hoxe temos o Baile do farolillo na Sala Bahía, mañá teremos a festa para os rapaces organizada pola Asociación de Amas de Casa e rematamos coa Queima o venres, no que esperamos a todos que gozaron do Entroido para que veñan rematalo”.