Cervo, 3 de febreiro de 2016.- O Concello de Cervo está presente dende este mércores e ata o vindeiro domingo, día 7, no Salón Internacional de Turismo Gastronómico Xantar, de Ourense.
A concelleira de Turismo, Manuela Méndez, estivo presente na inauguración deste evento. A presenza do Concello de Cervo neste certame ten como finalidade a difusión dos principais eventos que se celebran no municipio e a edil de Turismo salienta “a oportunidade de promover as festas de interese turístico, como a do Ourizo, a Maruxaina e a Queimada Popular de Cervo”. Manuela Méndez engadiu que “tamén se presentan a Festa do Mexillón e todos os recursos turísticos do concello”.
Para a concelleira de Turismo de Cervo “é unha oportunidade moi boa poder presentarse nunha feira galega, porque ás veces dentro da propia comunidade pode sacarse máis proveito aínda sendo máis pequena que outros grandes eventos como FITUR”.
O 17º Salón Internacional do Turismo Gastronómico celébrase dende este mércores, 3 de febreiro, ata o domingo día 7.