O Concello de Cervo abre o prazo de inscrición nos actos do XXXIII Día do Xubilado

Cervo, 17 de marzo de 2016. O vindeiro luns, día 21, ábrese o prazo para inscribirse nos actos do XXXIII Día do Xubilado, que se desenvolverán o 1 de maio, e tamén nos campionatos de tute e de parchís, que se organizan con motivo desta celebración e que se levarán a cabo en abril.

A concelleira de Servizos Sociais, Pilar Armada, anunciou que “para apuntarse nos campionatos de tute e de parchís, nos que poden participar os xubilados censados no concello de Cervo, hai que facelo na Casa do Mar, de San Ciprián; o prazo comeza este vindeiro luns e remata o día 30 deste mes de marzo. As partidas destes campionatos, que son actividades complementarias ás do Día do Xubilado, xogaranse en abril”.

E sobre a inscrición para as actividades do Día do Xubilado, que se desenvolverán o 1 de maio, o alcalde cervense, Alfonso Villares, fixo público este xoves un bando no que explica que “os requisitos para poder participar nesta celebración son ser pensionista polos conceptos de xubilación, invalidez ou viuvez, valerse por si mesmo e estar empadroado no Concello de Cervo. Os lugares de inscrición son a Casa do Concello de Cervo e a Casa do Mar, en San Cibrao, e o prazo é do 21 de marzo ao 20 de abril”.