As obras para a adecuación do sendeiro peonil Os Toxeiros rematan este ano en Barreiros

Santiago, 30 de outubro de 2016.- A Consellería de Medio Ambiente e Ordenación do Territorio rematará este ano as obras para a adecuación do sendeiro peonil Os Toxeiros, no Concello de Barreiros.

A actuación consiste en na recuperación dun tramo de máis dun quilómetro de lonxitude (1.065 metros) dun camilo existente, para o que se procedeu á retirada de terras –que na actualidade obstrúen o camiño- e posteriormente acondicionarase o sendeiro mediante o aporte de material de canteira para formar unha base sólida sobre a que se disporá unha capa de zahorra compactada para que o camiño sexa transitable.

Así, os traballos -que se iniciaron a semana pasada- consistirán no movemento de terras, na formalización da plataforma do camiño e tamén no saneamento das augas pluviais, coa colocación dunha tubaxe enterrada de polietileno de 400 mm de diámetro e 100 metros longo.

A actuación localízase no entorno do barrio da Barranca, na parroquia de San Miguel de Reinante, no concello de Barreiros. A zona de actuación inclúe terreos que forman parte ou limitan coa Rede Natura 2000, na ZEC As Catedrais.

Esta actuación, que ten un orzamento de 60.000 euros, ten por finalidade de garantir o seu carácter de utilidade pública, buscando un equilibrio entre o uso público seguro da mesma e a divulgación e conservación dos valores naturais e culturais polos que discorre, ademais de crear oferta no sector rural e a potenciación dun modelo de desenvolvemento sostible.