Modificacións no tráfico para rematar unha rotonda na zona do Perdouro

Burela, 31 de outubro de 2016. O vindeiro xoves, 3 de novembro, realizaranse modificacións no tráfico rodado en Burela para rematar a construción dunha rotonda na zona do Perdouro, en Arcadio Pardiñas, nas inmediacións do novo acceso ao porto. O tráfico nese lugar estará cortado e desviarase por outros lugares que estarán convenientemente sinalizados, segundo deu a coñecer este mediodía o alcalde, Alfredo Llano.

O rexedor explicou que “como xa todo o mundo vai coñecendo o que é o acceso ao porto para Burela vai culminar enseguida, calculamos que en poucos días estará rematado. E quero avisar de que o xoves vaise facer unha actuación na rotonda, na rúa Arcadio Pardiñas, na zona do Perdouro. Vanse realizar diversos traballos para rematar o que é rotonda que haberá nese punto, vaise asfaltar”.

Alfredo Llano indicou que “se vai desviar o tráfico, non se pode ir pola mañá alí ata que se remate esa obra, e vaise desviar a circulación. Xa se sinalizará para desviar o tráfico por outro lugar, porque a poucos metros da gasolineira xa non se vai poder pasar”.

O alcalde de Burela quere “avisar aos condutores desta molestia e pedir a colaboración de todos os veciños e veciñas de Burela” e advirte “aos condutores que poidan pasar por alí que o xoves non poderán facelo, pero que saiban que se vai sinalizar suficiente para que non haxa problemas”.