O PP de Ribadeo esíxelle ao Goberno local que elabore un plan sobre saneamento antes de pedir a axuda doutras administracións

Ribadeo, 17 de outubro de 2016.- O Grupo Municipal do PP de Ribadeo esíxelle ao Goberno local que elabore un plan integral sobre saneamento como paso previo para poder pedir axuda doutras administracións. Os populares saen así ao paso das declaracións do rexedor do BNG nas que di que o PP debe axudar a reclamar o saneamento.

O voceiro dos populares, Jesús López Penabad, explica que “debe ser o BNG, que é o que conta con maioría absoluta no Concello, quen faga propostas como Goberno antes de pedir a colaboración da oposición”. “O que non podemos desde o PP é gobernar por eles. Nós axudaremos en todo o que poidamos, como sempre o facemos, pero son eles os que teñen que facer propostas”.

Así, desde o PP non só lle reclaman aos nacionalistas un plan sobre o saneamento, senón tamén unha proposta para o arranxo dos camiños e pistas do rural, así como unha proposta global para que o rural cobre vida e non siga a estar discriminado.

“É lamentable que responda así e ademais cargue contra a Xunta cando é precisamente o Goberno galego quen está a financiar as obras de rebacheo que o Concello está a levar a cabo en diferentes estradas da localidade”, replican os populares. López Penabad recorda ademais que moitas das actuacións que se levan a cabo en Ribadeo son posibles grazas aos fondos que outorga a Xunta.

Por todo o anterior, o Grupo Municipal do PP pídelle ao rexedor que “deixe de botar balóns fóra” e faga os plans que corresponden a nivel municipal e despois terá a colaboración do PP para poder levalos a cabo”, insiste Penabad.

“Asegurámoslle ao señor Barcia que se o fai así tamén na Xunta atopará ‘amigos’, como el lles chama, que, tal e como é habitual, sigan a facer investimentos en Ribadeo”.