A Xunta investirá máis de 52.000 euros no acondicionamento das rúas do Porto e Francisco Vilasuso no Vicedo

A Consellería de Medio Ambiente e Ordenación do Territorio investirá máis de 52.000 no acondicionamento e mellora das rúas do Porto e Francisco Vilasuso, situadas no núcleo urbano do Vicedo.

Así se recolle no convenio asinado hoxe en Santiago entre a titular en funcións deste departamento autonómico, Beatriz Mato, e o o alcalde da localidade, José Jesús Novo.

Actualmente, o pavimento destes viarios atópase deteriorado debido ao paso do tempo, ao tránsito de vehículos pesados e ás incidencias meteorolóxicas. Estas deficiencias tradúcense en fochancas e gretas na calzada, que causan prexuízos aos usuarios.

Polo tanto, o obxectivo dos traballos que recolle o convenio é emendar estas deficiencias e actuar sobre a calzada para que estea en condicións adecuadas para o tránsito. Para conseguilo, procederase á limpeza e explanación da superficie; aplicarase un novo pavimento; modificaranse os pozos de rexistro afectados pola nova actuación; e executarase un sumidoiro para a recollida das augas pluviais.

Plan Hurbe
O Plan HURBE é un programa de actuación que a Xunta impulsou en 2010 para dar resposta á necesidade de humanización das vilas de Galicia. Tendo en conta o modelo social de integración cidadá, busca o achegamento dos entramados urbanos aos seus habitantes mediante a adecuación e creación de espazos públicos para as necesidades vixentes.

Segundo o Plan de investimentos da Consellería de Medio Ambiente e Ordenación do Territorio, a Consellería destinará este ano un total de máis de 11 millóns de euros. O orzamento destinarase, principalmente, á humanización de rúas e á urbanización e mellora de espazos públicos.

Entre outros beneficios, o HURBE favorece a sustentabilidade futura compatibilizando o desenvolvemento económico e a agrupación en torno aos núcleos de poboación con criterios de ordenación territorial e habitabilidade, recupera espazos públicos que foron perdendo o seu carácter de áreas de interacción social por un inadecuado desenvolvemento urbanístico, e potencia a conservación dos equipamentos urbanos patrimonio histórico das nosas vilas.