O Concello de Cervo entregou este mércores axudas para compra de libros e material escolar ás familias de 10 alumn@s do CEIP Cervo nº 1, de San Cibrao

Cervo, 28 de decembro de 2016. O Concello de Cervo entregou hoxe, mércores, axudas para compra de libros e material escolar ás familias de 10 alumnos e alumnas do Ceip Cervo Nº 1, de San Ciprián. No acto participaron o alcalde, Alfonso Villares, e a concelleira de Educación, Dolores García.

O rexedor municipal explicou: “vimos de entregar as axudas destinadas neste caso para a adquisición de libros e material escolar de alumnos e alumnas que fan o segundo ciclo de educación infantil no Ceip Cervo Nº 1. É outra das liñas de axudas educativas que temos dispostas no Concello de Cervo para que ás familias poida resultarlles menos gravoso os estudios dos seus nenos e nenas. Neste caso fixemos unha división para o colexio de Cervo e o de San Ciprián, que é unicamente porque nun centro teñen un procedemento á hora de pedir o material escolar e no outro teñen un sistema distinto. Por iso hoxe se entregaron as axudas unicamente para as familias de alumnos do Ceip Nº 1, de San Ciprián. Foron en total 10 axudas dun máximo cada unha de 130 euros, cantidade que non se chegou a cubrir por ningún dos solicitantes e perceptores. Pero aproveitamos para falar con eles e ver a posibilidade de que para o vindeiro curso se dean estas axudas, ao igual que para o colexio de Cervo, ao final de curso, para intentar que se poida cubrir o máximo posible a cantidade que temos estipulada desde o Concello de Cervo para estas axudas educativas”.

A edil de Educación comentou que “son axudas educativas polas que vamos seguir apostando, ao igual que polas que tamén entregamos esta semana aos rapaces que estudan fóra do noso concello e igual que as que concedemos ás Anpas e aos centros educativos do concello de Cervo. Todo isto a maiores das distintas obras de infraestruturas, de melloras e de mantemento que estamos a abordar continuamente tanto nos dos colexios de Infantil e Primaria do noso concello como tamén no instituto Marqués de Sargadelos e na escola infantil. Son exemplos da aposta do Concello de Cervo pola educación, que imos seguir mantendo nos vindeiros anos e incrementando na medida das nosas posibilidades”.