Remataron as III xornadas gastronómicas “Asturias en Ribadeo”

Ribadeo, 30 de abril de 2017. Éxito das xornadas gastronómicas Asturias en Ribadeo, organizadas por Acisa. Comezaron o venres e rematan hoxe ofrecendo o mellor da cociña asturiana a tod@s os que estes días se achegaron a pasar a ponte do primeiro de maio a Ribadeo. Nos 22 locais participantes sérvense menús de fin de semana e degustación, tapas e pinchos dos pratos máis representativos da veciña Asturias.

As terceiras xornadas Asturias en Ribadeo contaron coa animación musical de tres grupos de gaitas, que percorreron todas as rúas da localidade “levando o ambiente festivo máis aló da zona comercial das Catro Calles, algo que gustou moito á xente que paseaba e saboreaba as propostas culinarias da cociña asturiana en Ribadeo”, explican desde a directiva de Acisa. O venres os encargados de poñer a nota musical foron os membros de Brisas del Eo, de San Tirso de Abres, e onte foi a quenda para El Trasno, de Coaña. Hoxe domingo, si o tempo o permite, será A Subela, de Foz, o grupo que se encargue de animar as rúas ribadenses.

Finalmente son 22 os locais hostaleiros que están a participar nas xornadas Asturias en Ribadeo: A Dorada, O Bodegón, O Cabazo, Costa Verde, Oviedo Bar II, hotel Rolle, Galipizza, Queimada, Cienfuegos, Breogán, La Cuchara de Palo, A Menchina, Rosalar, Malo Será, La Botellería, La Lira, Mediante, Mareta, A Ribeira, Porta Norte, Prohibido y La Quinta.

Acisa fai un balance positivo de cómo está a ser a ponte do primeiro de maio: “hai moitos hoteis na vila que están desde o sábado ao 100% de ocupación. Non hai máis que dar unha volta polas rúas para ver o ambiente que se respira estes días en Ribadeo. Está a ser unha boa ponte, a pesares de que chega aos poucos días dunha Semana Santa de auténtico récord para nós. O martes é festivo en Madrid e iso nótase aquí”.