A rolda de mesas de traballo sectoriais de “Galicia Norte. Mares de Experiencias” continúa en Miño e en Ortigueira

Viveiro, 14 de xullo de 2017.- Os encontros de traballo do proxecto turístico de cooperación
interterritorial “Galicia Norte. Mares de Experiencias” continúan, e finalizan a próxima semana, con outras dúas mesas de traballo en Miño e en Ortigueira ás que acudirán representantes da administración, do tecido asociativo e empresarial dos concellos participantes nesta iniciativa.

Calendario de mesas de traballo:
• Martes, 18 de xullo ás 10.30h, na Casa do Pescador – Miño.
• Mércores, 19 de xullo ás 10.30h, Centro de San Roque – Ortigueira.

O obxectivo destes encontros é que sexan os propios axentes implicados quen decidan que atractivos naturais e culturais relacionados co mar se incluirán nos 10 paquetes experienciais que resultarán deste proxecto de turismo mariñeiro financiado con fondos europeos. O pasado mércores 12 tivo lugar a primeira mesa de traballo en Viveiro cunha alta participación.

A cuarta parte do litoral galego
“Galicia Norte. Mares de Experiencias” é un proxecto de cooperación interterritorial de turismo mariñeiro impulsado polos GALP (Grupos de Acción Local do Sector Pesqueiro) A Mariña-Ortegal e Golfo Ártabro Norte, nos 23 concellos da Coruña e de Lugo que conforman a súa área de actuación.
Tras catro intensos meses de traballo, esta iniciativa colaborativa terá como resultado a creación de 10 experiencias turísticas (5 por cada GALP) ao longo duns 384 kilómetros de costa da Galicia máis septentrional, a cuarta parte do litoral galego. Tamén se formará á poboación para dinamizar a creación de novos produtos e servizos relacionados co mar e co turismo mariñeiro para impulsar o relevo xeracional no sector da pesca, sobre todo entre a poboación feminina e desempregados en xeral, e fixar poboación nova na zona.