Ourol (Lugo), 18 de xullo de 2017.- A Consellería de Sanidade acometerá obras de mellora da accesibilidade e modernizará o recinto exterior do centro de saúde de Ourol, que incluirán desde a renovación do pavimento da actual zona de aparcamento e acceso peonil, ata a instalación de varandas e colocación de novos elementos de apoio para persoas con mobilidade reducida.
Así o explicou esta mañá o delegado territorial da Xunta en Lugo, José Manuel Balseiro, quen indicou que desde a administración autonómica -en concreto a Xerencia de Xestión Integrada de Lugo, Cervo e Monforte- vén de efectuar un estudo de necesidades que, unha vez executadas, suporán unha renovación integral destes espazos de acceso empregados habitualmente polos usuarios do centro de saúde.
Está previsto que as actuacións se inicien despois do verán, con máis seguridade no último trimestre do ano. Ao obxecto de causar o menor prexuízo posible na actividade ordinaria do centro o prazo de execución dos traballos estableceuse en 4 semanas.
As obras incluirán tamén actuar sobre os revestimentos exteriores deteriorados polo paso do tempo, impulsando melloras estéticas que implican o pintado e a realización dun tratamento que evite o envellecemento prematuro e permita soportar con maior capacidade as inclemencias climatolóxicas. Tamén se construirá unha nova beirarrúa e distribución da zona axardinada.
O Goberno galego traballa por modernizar os servizos e mellorar a confort dos usuarios deste centro de saúde xunto ás condicións de traballo dos profesionais. Ao edifico, que alberga as consultas de atención primaria, se accede en ocasións con ambulancias, vehículos particulares, padiolas ou cadeiras de rodas que disporán dunha estrutura moito máis acaída para o seu uso.